Molakaffi: Sandra, Rúnar, Daníel Þór og Esbjerg og Herning-Ikast

Sandra Erlingsdóttir var maður leiksins í gær. Mynd/Aðsend
  • Sandra Erlingsdóttir var valinn maður leiksins í gær þegar lið hennar EH Aalborg tapaði fyrir SönderjyskE í fyrsta umspilsleiknum um keppnisrétt til að skora á næst neðsta lið dönsku úrvalsdeildarinnar í umspilsleiki um sæti í úrvalsdeildinni á næsta keppnistímabili. Sandra skoraði fimm mörk, þar af eitt úr vítakasti, og var næst markahæst í liði sínu. Eins og kom fram á handbolta.is í gær þá tapaði EH Aalborg með þriggja marka mun, 26:23, og verður að vinna leikinn á útivelli á fimmtudaginn til þess að krækja í oddaleik á heimavelli. 
  • Rúnar Kárason skoraði fjögur mörk og átti þrjár stoðsendingar þegar Ribe-Esbjerg tapaði fyrir Fredericia, 31:29, á heimavelli í keppni neðstu liðanna í dönsku úrvalsdeildinni í handknattleik í gær. Keppnin gengur út á að komast hjá því að lenda í umspili um keppnisrétt í deildinni á næsta ári gegn liði úr B-deildinni. 
  • Daníel Þór Ingason skoraði þrjú mörk fyrir Ribe-Esbjerg og átti eina stoðsendingu. Þetta var næsta síðasti deildarleikur þeirra félaga fyrir Ribe-Esbjerg en liðið á aðeins einn leik eftir í kjallarakeppninni. Þess utan er það sloppið úr hættu við að lenda í umspilsleikjunum. Bæði Daníel Þór og Rúnar kveðja Ribe-Esbjerg við lok leiktíðar. Rúnar flytur heim og gengur til liðs við ÍBV en óvíst er hjá hvaða útgerð Daníel Þór verður munstraður á næstu handknattleiksvertíð.  
  • Danmerkurmeistarar Team Esbjerg eru öruggir um sæti í undanúrslitum um danska meistaratitilinn í handknattleik kvenna. Sömu sögu er að segja um lið Herning-Ikast. Þessi tvö lið eru örugg áfram úr riðli eitt í átta liða úrslitum. Viborg, Odense og Århus United berjast enn um tvö sæti í undanúrslitum úr hinum riðli átta liða úrslita. Línur í þeim riðli skýrast væntanlega  síðar í dag.
- Auglýsing -

Nýjustu fréttir

- Auglýsing -