- Auglýsing -
- Sandra Erlingsdóttir og samherjar hennar í EH Aalborg unnu afar góðan sigur á Bjerringbro, 38:32, á útivelli í dönsku 1. deildinni í handknattleik í gær. Sandra var næst markahæst hjá EH Aalborg með átta mörk, þar af voru tvö markanna skoruð úr vítaköstum. EH Aalborg er í fimmta sæti með sex stig að loknum fimm leikjum.
- Sigvaldi Björn Guðjónsson skoraði fjögur mörk þegar Vive Kielce vann Azoty Pulawy, 29:28, á útivelli í pólsku 1. deildinni í handknattleik í gær. Haukur Þrastarson komst ekk blað hjá Kielce að þessu sinni. Kielce og Wisla Plock eru efst í deildinni með 18 stig eftir sex umferðir. Azoty Pulawy er þar á eftir með 12 stig.
- Aron Pálmarsson skoraði sjö mörk í níu skotum og átti tvær stoðsendingar þegar Danmerkurmeistarar Aalborg unnu nauman sigur á Skjern, 27:26, í dönsku úrvalsdeildinni í gær. Leikið var í Skjern og var uppselt á leikinn, 2.300 áhorfendur greiddu aðgang. Arnór Atlason er aðstoðarþjálfari Aalborg sem er í öðru sæti deildarinnar með 12 stig eftir sjö leiki.
- Viktor Gísli Hallgrímsson og samherjar í GOG sitja í efsta sæti með 14 stig að loknum sjö leikjum. Þeir unnu TMS Ringsted í gær, 36:31. Viktor Gísli var allan leikinn í marki GOG og varði níu skot, þar af eitt vítakast, 24,3% markvarsla.
- Storhamar, liðið sem Axel Stefánsson þjálfar, er áfram í efsta sæti í norsku úrvalsdeildinni í handknattleik kvenna. Storhamar vann Fana, 33:26, á útivelli í gær og er með 14 stig eftir sjö leiki. Liðið er stigi á undan Evrópu- og Noregsmeisturum Vipers Kristiansand.
- Viktor Norberg Petersen skoraði sjö mörk fyrir Drammen og Óskar Ólafsson tvö þegar liðið vann nauman sigur á H71 í annarri umferð Evrópubikarkeppninnar í handknattleik í gær, 24:22. Leikið var í Höllini á Hálsi í Þórshöfn.
- Ólafur Andrés Guðmundsson var í sigurliði Montpellier í gær þegar það vann Dunkerque, 31:26, í frönsku 1.deildinni í handknattleik. Ólafur skoraði ekki mark í leiknum. Montpellier færðist upp í sjöunda sæti með þessum sigri.
- Arnar Birkir Hálfdánsson skoraði þrjú mörk og átti þrjár stoðsendingar þegar EHV Aue gerði jafntefli við Elbflorenz í þýsku 2. deildinni í gær. Leikið var á heimavelli Aue. Midaugas Dumcius, sem eitt sinn lék með Akureyri handboltafélagi, skoraði fjögur mörk fyrir Dresden-liðið. Sveinbjörn Pétursson stóð stutta stund í marki Aue og varði eitt skot. Áki Egilsnes, fyrrverandi liðsmaður KA, komst ekki á blað. EHV Aue er í áttunda sæti með sex stig eftir sex leiki.
- Auglýsing -
