Molakaffi: Sara Dögg, Axel, Ágúst Elí, Mogensen, Morros

Sara Dögg Hjaltadóttir t.v. gengur til liðs við Val í sumar. Mynd/Valur
  • Sara Dögg Hjaltadóttir og samherjar í Gjerpen HK Skien eru í góðum málum í umspilskeppni þriggja liða um sæti í norsku úrvalsdeildinni. Gjerpen HK Skien hefur unnið báða leiki sína til þessa. Í gær vann liðið Haslum Bærum Damer, 26:22, á heimavelli og á Gjerpen tvo leiki eftir.  Sara Dögg skoraði ekki mark í leiknum í gær.  Hún flytur heim í sumar og gengur til liðs við Val eins og kom fram á handbolti.is um miðjan síðasta mánuð. 
  • Axel Stefánsson og lið hans Storhamar vann sér sæti í undanúrslitum úrslitakeppni norsku úrvalsdeildar kvenna í handknattleik í gær með öðrum sigri á Romerike Ravens, 37:24, í Skedsmohallen  í Lillestrøm
  • Þrátt fyrir fjögurra marka tap fyrir SønderjyskE, 37:33, í Sønderborg í næst síðustu umferð neðri hluta keppni dönsku úrvalsdeildarinnar í handknattleik í gærkvöld þá heldur Kolding sæti sínu í deildinni á næsta keppnistímabili. Ágúst Elí Björgvinsson markvörður, sem kveður Kolding í sumar og flytur sig vestar á Jótlandi, til Ribe-Esbjerg, stóð í marki liðsins hluta úr leiknum í gærkvöld og varði þrjú skot, 15%. Holstebro rekur lestina í botnslagnum og mætir annað hvort HØJ eða Grindsted úr 1. deild í umspili um sæti í úrvalsdeild á næsta keppnistímabili. 
  • Danski handknattleiksmaðurinn Thomas Mogensen lék sinn síðasta leik í gær en hann hefur leikið með SønderjyskE síðustu tvö ár eftir að hafa verið um árabil í Þýskalandi. Mogensen lék 106 leiki með danska landsliðinu frá 2003 til 2014 og var í 11 ár leikmaður Flensburg
  • Viran Morros hefur samið við Pfadi Winterthur til næstu tveggja ára frá og með miðju þessu ári. Morros, sem er Spánverji, leikur um þessar mundir með Füchse Berlin.
- Auglýsing -

Nýjustu fréttir

- Auglýsing -