Molakaffi: Sigrún Ása, Manaskov, Wiklund biðst afsökunar og bíður örlaga sinna

Sigrún Ása Ásgrímsdóttir hefur gengið til liðs við ÍR á nýjan leik. Mynd/ÍR
  • Sigrún Ása Ásgrímsdóttir hefur skrifað undir samning við handknattleiksdeild ÍR. Hún þekkir vel til hjá ÍR eftir að hafa leikið með liði félagsins áður en hún gekk til liðs við Stjörnuna. Sigrún Ása á að baki fjölda yngri landsleikja. Hún er að koma til baka í handboltann eftir barnsburð, segir í tilkynningu frá ÍR. 

  • Dejan Manaskov hefur gengið til liðs við Vardar á nýjan leik, sex árum eftir að hann hleypti heimdraganum. Manaskov lék með Veszprém í Ungverjalandi á síðasta keppnistímabili. Koma Manaskov hleypir nýju lífi í lið Vardar sem hefur mátt sjá á eftir nokkrum þekktum leikmönnum og þjálfara sínum á síðustu vikum. 
  • Sænski handknattleiksþjálfarinn Pontus Ward Wiklund hefur beðið alla hlutaðeigandi innilegrar afsökunar á framkomu sinni á Kastrupflugvelli á föstudaginn. Þá sló hann fram að gamni sínu við tollskoðun að hann væri með sprengju í handfarangurstösku sinni. Wiklund var þá á leiðinni með U18 ára kvennalandslið Svía til Skopje til þátttöku á heimsmeistaramótinu. 
  • Eins og nærri má geta féll gamansemi Wiklund vægast sagt í grýttan jarðveg. Var hann m.a. handtekinn auk þess sem miklar tafir urðu á flugumferð á vellinum. Wiklund fór vitanlega ekki með sænska landsliðinu til Skopje heldur sat eftir í Danmörku. Honum var sleppt eftir yfirheyrslu en á yfir höfði sér ákæru. Í yfirlýsingu segir Wiklund framkomu sína fullkomlega óviðunandi. Hann skammist sín og sé reiðbúinn að súpa seyðið af orðum sínum og þeim málalokum sem hann eigi skilið. 

  • Wiklund heldur áfram þjálfun karlaliðs Önnereds í Gautaborg en hefur væntanlega lokið störfum fyrir sænska handknattleikssambandið. Önnereds harmar framkomu hans í tilkynningu og segir þau með öllu óboðleg og lýsi alls ekki þeim manni sem félagsmenn hafi kynnst.
- Auglýsing -

Nýjustu fréttir

- Auglýsing -