- Auglýsing -
- Sigurður Hjörtur Þrastarson og Svavar Ólafur Pétursson dæma viðureign Svartfjallalands og Póllands á Evrópumóti 18 ára landsliða í Podgorica í Svartfjallalandi í dag. Þeir dæmdu viðureign Ungverjalands og Portúgals á mótinu í gær. Ungverjar unnu með eins marks mun, 24:23, og er taplausir á mótinu. Að leiknum loknum í dag hafa þeir félagar dæmt fjóra leiki á mótinu.
- Handknattleiksmennirnir Allan Norðberg og Jóhann Geir Sævarsson hafa framlengt samninga sína við KA, eftir því sem fram kemur í tilkynningu frá handknattleiksdeild félagsins í gær. Norðberg kom til liðs við KA frá StÍF í heimalandinu sínu fyrir fjórum árum.
- Fjórar norskar handknattleikskonur höfnuðu í fjórum efstu sætum í kjöri á bestu handknattleikskonu heims á síðasta ári sem handball-planet stóð fyrir meðal lesenda sinna. Nora Mørk varð efst og fékk 22% atkvæða. Henny Reistad varð önnur, Stine Bredal Oftedal og Kari Brattset Dale höfnuðu jafnar að stigum í þriðja sæti. Til viðbótar eru sex norskrar landsliðskonur í átta manna úrvalsliði sem einnig var valið við sama tilefni hjá handball-planet.
- Mattias Andersson hefur framlengt samning sinn um þjálfun markvarða þýsku bikarmeistaranna THW Kiel til ársins 2024. Andersson hefur þjálfað markverði liðsins síðan hann lagði skóna að mestu leyti á hilluna fyrir fjórum árum. Einnig er Andersson í þjálfarateymi þýska karlalandsliðsins og starfar þar með Alfreð Gíslasyni landsliðsþjálfara.
- Handknattleikssamband Óman hefur ákveðið að komið verði á skipulagðri deildarkeppni kvenna í handknattleik frá og með komandi vetri. Skipulagt mótahald meðal kvenna í handknattleik hefur ekki verið fyrir hendi. Til stendur að tíu lið taki þátt í deildarkeppninni til að byrja með og er reiknað með að fyrsti leikurinn verði 4. nóvember. Handknattleikur hefur rutt sér til rúms víða meðal kvenna í Arabaríkjum á síðustu árum og má þar m.a. nefna Íran og Egyptaland.
- Auglýsing -
