- Auglýsing -
- Sigvaldi Björn Guðjónsson skoraði eitt mark fyrir Vive Kielce þegar liðið vann Veszprém, 32:29, í rífandi góðri stemningu á heimavelli í annarri umferð B-riðils Meistaradeildar Evrópu í handknattleik í gærkvöldi. Fullt hús var í Kielce og drógu stuðningsmenn liðsins ekkert af sér. Þeir voru áttundi maður liðsins í leiknum sagði Bertus Servaas forseti Kielce í gærkvöld himinglaður með sigurinn og áhorfendur.
- Haukur Þrastarson var í leikmannahópi Kielce í gærkvöld en kom ekkert við sögu í leiknum, eftir því sem næst verður komist. Þetta var í fyrsta skipti á keppnistímabilinu sem Selfyssingurinn er á leikskýrslu.
- Roland Eradze og liðsmenn Motor Zaprozhye töpuðu fyrir Barcelona með 11 marka mun, 36:25, á heimavelli Evrópumeistaranna en liðin eru einnig í B-riðli Meistaradeildarinnar eins og PSG sem vann Dinamo Búkarest, 41:30, á heimavelli og Porto sem lagði Flensburg, 28:27, í Porto. Leikmenn Porto skoruðu fjögur síðustu mörk leiksins. Areia Rodrigues skoraði sigurmarkið úr vítakasti þegar leiktíminn var úti.
- Kristján Örn Kristjánsson, Donni, skoraði fimm mörk úr átta skotum, vann eitt vítakast og skapaði tvö færi auk þess að stela boltanum einu sinni í leik með PAUC í gær gegn Chambéry á útivelli í frönsku 1. deildinni í handknattleik. Frammistaða Donni dugði ekki til sigurs að þessu sinni því leikmenn Chambéry unnu með fjögurra marka mun, 30:26, eftir að hafa verið marki yfir í hálfleik, 15:14. Þetta var fyrsta tap PAUC í frönsku 1. deildinni á leiktíðinni og um leið þriðji leikur liðsins á útivelli á síðustu níu dögum. Þar á undan lék PAUC við ÖIF Arendal í 2. umferð Evrópudeildarinnar í Noregi á þriðjudagskvöld.
- Auglýsing -
