- Auglýsing -
- Ágúst Elí Björgvinsson og félagar í danska úrvalsdeildarliðinu Kolding hafa ekki farið varhluta af kórónuveirunni. Einn félagi þeirra smitaðist og fóru leikmenn og þjálfarar í tveggja daga sjálfskipaða sóttkví eftir því sem fram kemur á TV2 í Danmörku. Ágúst Elí sagði í skilaboðum til handbolta.is í gærkvöld að liðið hefði æft í gær en skimun standi fyrir dyrum í dag.
- Kolding lék í síðustu viku við Lemvig. Hjá Lemvig hafa greinst a.m.k. tvö smit eftir að liðið mætti GOG nokkrum dögum fyrir viðureignina við Kolding. Eins og fram kom á handbolti.is um liðna helgi er ófremdarástand innan GOG-liðsins og nærri tveir tugir leikmanna, þjálfara og starfsmanna hafa smitast af veirunni.
- Sænski markvörðurinn Josip Cavar yfirgefur Svein Jóhannsson og samherja í SönderjyskE eftir þetta keppnistímabil og gengur til liðs við Holstebro. Hann verður þar með liðsfélag Óðins Þórs Ríkharðssonar. Cavar er einn af betri markvörðum dönsku úrvalsdeildarinnar. Hann skrifaði undir tveggja ára samning við Holstebro.
- Eitt helsta dómarapar Þjóðverja á síðustu árum, Lars Geipel og Marcus Helbig hafa ekkert dæmt á þessari leiktíð. Ástæðan er sú að Helbig hefur ekki verið við góða heilsu. Geipel sagði við þýska fjölmiðla að hann vonist til að Helbig jafni sig á komandi vikum og mánuðum þannig að þeim verði mögulegt að taka upp þráðinn aftur. Þeir félagar hafa dæmt á flestum stórmótum karla síðustu árin og í Meistaradeild Evrópu. Saman hafa þeir dæmt í 27 ár, þar af 20 í þýsku 1. deildinni í karlaflokki.
- Þýska handknattleikssambandið samþykkti í gær að áfram verði hlé á keppni í 3.deild karla og í deild ungmennaliða. Hléinu átti að ljúka um mánaðarmótin en hefur verið framlengt til loka janúar. Keppni í þessum deildum var söltuð í byrjun nóvember þegar aukinn þungi færðist í útbreiðslu kórónuveirunnar í Þýskalandi.
- Auglýsing -
