Molakaffi: Stefán, Bjarni Ófeigur, Díana Dögg, Arnar Birkir, Sveinbjörn, Aron, Orri, Viktor, Óskar, Madsen

Stefán Arnarson þjálfari Fram og leikmenn unnu ÍBV í þremur leikjum. Mynd/Egill Bjarni Friðjónsson
  • Stefán Arnarson þjálfari kvennaliðs Fram varð í gær deildarmeistari í handknattleik í sjöunda sinn sem þjálfari. Stefán var þjálfari Vals í fjögur skipti þegar liðið vann deildarmeistaratitilinn í handknattleik kvenna á síðasta áratug. Stefán hefur tvisvar stýrt Fram til sigurs um deildarmeistaratitilinn, síðast í gær. Fyrsta deildarmeistaratitilinn sem þjálfari vann Stefán með kvennaliði Víkings fyrir 22 árum. 
  • Bjarni Ófeigur Valdimarsson og samherjar hans í sænska úrvalsdeildarliðinu IFK Skövde komust í gær í undanúrslit í úrslitakeppninni um sænska meistaratitilinn. Skövde vann stórsigur á Hammarby, 37:23, í þriðju viðureign liðanna á heimavelli í gær. Bjarni Ófeigur skoraði þrjú mörk og átti tvær stoðsendingar. Einnig var honum vísað af leikvelli í tvígang, í tvær mínútur í hvort skipti. Skövde er eina liðið sem þegar er komið í átta liða úrslit. Þrjú einvígi standa enn yfir. 
  • Díana Dögg Magnúsdóttir skoraði fimm mörk, átti þrjár stoðsendingar, skapaði eitt færi, stal boltanum einu sinni og stöðvaði tvö hraðaupphlaup í gær þegar lið hennar BSV Sachsen  Zwickau tapaði illa á heimavelli fyrir sterku liði Bietigheim í þýsku 1. deildinni í handknattleik. Zwickau byrjaði leikinn vel. Staðan var jöfn, 10:10, eftir 25 mínútur. Upp úr því fór allt í skrúfuna hjá liðsmönnum Zwickau og því fór sem fór. Zwickau er næst neðst en á átta leiki eftir í deildinni. 
  • EHV Aue krækti í eitt stig í gær í þýsku 2. deildinni í handknattleik karla með jafntefli við Ferndorf á útivelli, 24:24. Arnar Birkir Hálfdánsson hafði sig lítið í frammi og skoraði ekki mark að þessu sinni.  Sveinbjörn Pétursson var í marki Aue annan hálfleikinn og varði sex skot, 35%. Aue rekur lestina í deildinni þegar liðið á níu leiki eftir. Aue hefur 17 stig og er stigi á eftir Dormagen.
  • Elverum tókst ekki að ljúka norsku úrvalsdeildinni án taps. Í síðustu umferð í gær tapaði liðið á heimavelli fyrir Drammen, 30:24, og lauk keppni með 50 stig í 26 leikjum. Nokkuð er síðan leikmenn Elverum fögnuðu norska meistaratitlinum en hann hreppir liðið sem vinnur deildarkeppnina en ekki úrslitakeppnina eins og t.d. hér á landi.  Aron Dagur Pálsson skoraði eitt mark fyrir Elverum í gær en Orri Freyr Þorkelsson ekkert.  Viktor Petersen Norberg skoraði fjórum sinnum fyrir Drammenliðið og Óskar Ólafsson einu sinni. Drammen hafnaði í öðru sæti. 
  • Elverum mætir Halden í átta liða úrslitum í úrslitakeppninni sem hefst síðar í þessum mánuði. Drammen leikur við Bækkelaget Håndball EliteSandefjord, Bergen og Tønsberg Nøtterøy falla úr deildinni en frá og með næstu leiktíð verða 12 lið á nýjan leik í úrvalsdeildum karla og kvenna í Noregi. Liðum var tímabundið fjölgað meðan kórónuveirfaraldurinn stóð sem hæst og ekkert lið féll úr deildunum. 
  • Stefan Madsen þjálfari danska meistaraliðsins Aalborg Håndbold hefur skrifað undir samning við félagið sem gildir til ársins 2025. Madsen tók við þjálfun liðsins 2018 af Aroni Kristjánssyni. Arnór Atlason verður áfram aðstoðarþjálfari liðsins og hægri hönd Madsens. Arnór framlengdi samning sinn fyrir ári. Aalborg Håndbold lék til úrslita í Meistaradeild Evrópu fyrir ári. Aron Pálmarsson leikur með liði félagsins.
- Auglýsing -

Nýjustu fréttir

- Auglýsing -