Molakaffi: Steinunn vann, Elín Jóna, Ómar Ingi, Bjarki Már, Svíi á lyfjum, Jin-young

Steinunn Hansdóttir leikmaður Skanderborg Håndbold. Mynd/FB-síða Skanderborg Håndbold
  • Steinunn Hansdóttir og samherjar í Skandeborg Håndbold unnu sinn fyrsta leik í dönsku úrvalsdeildinni í handknattleik í gærkvöld þegar þær lögðu København Håndbold, 30:26, á heimavelli síðarnefnda liðsins. Um var að ræða fyrsta sigur Skandeborg-liðsins í  deildinni í fjórum leikjum.
  • Elín Jóna Þorsteinsdóttir og félagar hennar í Ringköbing töpuðu fyrir Danmerkurmeisturum Odense Håndbold, 35:18, í Óðinsvéum í dönsku úrvalsdeildinni í handknattleik í gær. Elín Jóna stóð hluta leiksins í marki Ringköbing og varði fjögur skot, 18%. Ringköbing er án stiga eftir fjóra leiki.
  • Íslenskir handknattleiksmenn settu svip sinn á tvær fyrstu umferðir þýska handknattleiksins. Ómar Ingi Magnússon markakóngur síðasta keppnistímabils og leikmaður SC Magdeburg var valinn í lið fyrstu umferðar. Bjarki Már Elísson, Lemgo, fylgdi í kjölfarið og er í liði annarrar umferðar sem lauk um síðustu helgi. 
  • Sænski handknattleiksmaðurinn Richard Hanisch er kominn í tveggja ára bann eftir að hafa fallið á lyfjaprófi í vor en merki um notkun methylhexanamine fannst í sýni hjá kappanum. IFK Skövde hefur einnig sagt upp samningi sínum við Hanisch sem er 31 árs gamall. Hann hefur m.a. leikið með Hammarby Handboll, Redbergslids IK, IFK Kristianstad og Skövde í heimalandi sínu auk Elverum í Noregi. Hanisch var m.a. í liði HSV Hamburg 2013 þegar það vann Meistaradeild Evrópu.
  • Hinn 21 árs gamli Suður-Kóreumaður, Kim Jin-young, hefur samið við spænska liðið Ademar León. Jin-young fór á kostum með landsliði Suður-Kóreu á heimsmeistaramótinu í Egyptalandi í byrjun árs og vakti fyrir vikið talsverða athygli í ungu og efnilegu landsliði sem sent var til leiks.
- Auglýsing -

Nýjustu fréttir

- Auglýsing -