- Auglýsing -

Molakaffi: Sterk staða hjá Roland og félögum, loksins leikur og Cots stendur fyrir sínu

Savukynas Gintaras, Roland Eradze og leikmenn Motor unnu í Nantes í gær. Mynd/Motor
  • Úkraínska meistaraliðið Motor Zaporozhye, þar sem Roland Eradze er aðstoðarþjálfari, vann Nantes með eins marks mun í Meistaradeild Evrópu í handknattleik karla í gær, 29:28. Leikið var í Zaporozhye. Leiknum hafði verið frestað í vetur vegna veirunnar. Motor er þar með komið upp í þriðja sæti B-riðils með 12 stig að loknum níu leikjum og stendur þar af leiðandi orðið vel að vígi. Er t.d. fimm stigum á undan Kiel sem er í fimmta sæti. Kiel á að vísu leik inni á Motor. 
  • Eftir mánaðarhlé frá leikjum vegna kórónuveirusmita innan liðsins lék Kadetten Schaffhausen loksins kappleik um helgina. Liðið sem er þjálfað af Aðalsteini Eyjólfssyni vann Bern, 25:24, á heimavelli. Mjög erfitt ástand var innan liðsins vikum saman eftir að hver leikmaðurinn á fætur öðrum  smitaðist af kórónuveirunni, að öllum líkindum, í keppnisferð til Norður-Makedóníu til þátttöku í Evrópudeildinni. 
  • Britney Cots, handknattleikskona hjá FH, hefur undanfarna daga verið í æfingabúðum í Frakklandi með landsliði Senegal. Landsliðið hefur leikið æfingaleiki við frönsk félagslið. Cots hefur tekið þátt í öllum leikjunum og staðið sig vel. Leikirnir eru liður í æfingabúðum landsliðs Senegal en það tekur þátt í forkeppni Ólympíuleikanna sem fram fara eftir miðjan mars. 
- Auglýsing -
- Auglýsing -

Nýjustu fréttir

- Auglýsing -