- Auglýsing -
- Josefine Meerkamp er elsta handknattleikskona í heiminum um þessar mundir. Hún hefur meira að segja fengið það staðfest í heimsmetabók Guinness og er með skjal máli sínu til stuðnings. Meerkamp er 75 ára gömul og 302 daga. Hún leikur enn með kvennaliði Solingen í áhugamannaliði, svokölluðu „old girls.“
- Danski handknattleiksmaðurinn Mads Öris Nielsen ætlar að leggja skóna á hillina í vor, fertugur að aldri. Nielsen hefur síðustu ár leikið með Bjerringbro/Silkeborg en hefur víða verið og m.a. leikið með danska landsliðinu á árum áður.
- Mikkel Hansen segist eiga erfitt með að sjá fyrir endann á keppnistímabilinu í Frakklandi. Það er allt úr skorðum gengið vegna kórónuveirunnar sem stingur sér niður með reglubundnum hætti hjá liðum efstu deildar. Nú um stundir eru Hansen og félagar í sóttkví eftir að smit kom upp innan liðsins í byrjun vikunnar.
- Hansen segir að ljóst sé að leika verði fram á sumar. Einnig á lið hans, PSG, eftir að leika í Meistaradeildinni. Til viðbótar bætist þátttaka danska landsliðsins á Ólympíuleikunum í sumar þar sem Danir eiga titil að verja. Hansen telur að sumarleyfið fari í undirbúning fyrir leikana því strax að þeim loknum taki við æfingar fyrir næsta keppnistímabil.
- Ásthildur Bertha Bjarkardóttir framlengdi nýverið samning sinn við kvennalið Stjörnunnar sem leikur í Olísdeildinni. Ásthildur sem er örvhent og leikur í hægra horni er 18 ára gömul og kom til Stjörnunnar frá Fylki.
- Auglýsing -
