- Auglýsing -
- Sveinbjörn Pétursson, markvörður EHV Aue, er einn sjö leikmanna sem koma til greina í kjöri á leikmanni júnímánaðar í þýsku 2. deildinni í handknattleik karla. Sveinbjörn stóð fyrir sínu á lokaspretti deildarkeppninnar en það dugði ekki til og liðið féll enda ekki eins manns verk að halda liði uppi í deild. Hægt er að taka þátt í valinu og kjósa Sveinbjörn með því að smella hér.
- Einnig er hægt að velja Ómar Inga Magnússon leikmann þýsku meistaranna SC Magdeburg sem leikmann júnímánaðar í þýsku 1. deildinni en hann er einn af þeim sem kemur til greina. Ómar Ingi varð fyrir valinu í síðasta mánuði enda fór á hann á kostum í leikjum deildarinnar alla mánuðina sem keppnin stóð yfir. Áhugasamir geti tekið þátt í kosningunni með því að smella hér.
- Hollenski landsliðsmaðurinn Luc Steins hefur framlengt samning sinn við franska meistaraliðið PSG til ársins 2026. Steins var á dögunum valinn besti leikmaður frönsku 1. deildarinnar en hann kom til félagsins síðla árs 2020 þegar Nikola Karabatic sleit krossband í hné.
- Norska handknattleiksstjarnan Sander Sagosen segir í viðtali við TV2 í heimalandi sínu að hann lifi í voninni um að geta leikið með norska landsliðinu á heimsmeistaramótinu sem fram fer í janúar. Sagosen meiddist illa á ökkla í næsta síðustu umferð þýsku 1. deildarinnar og leikur væntanlega ekkert handknattleik á þessu ári.
- Eftir því sem næst verður komist á engin sjónvarpsstöð réttinn að leikjum úrslitahelgar Meistaradeildar karla í handknattleik sem fram fer á morgun og á sunnudaginn í Köln. Þar af leiðandi eiga íslenskir handknattleiksunnendur, sem eru ekki þegar komnir til Kölnar, að eiga þess kost að sjá leikina á morgun og á sunndaginn án endurgjalds á ehftv.com. Í undanúrslitum á morgun mætast Vive Kielce og Veszprém annarsvegar klukkan 13.15 og Kiel og Barcelona hinsvegar klukkan 16. Einn íslenskur handknattleiksmaður tekur þátt í leikjunum, Haukur Þrastarson með Vive Kielce. Sigurliðin í leikjunum á morgun mætast í úrslitaleik á sunnudaginn klukkan 16.
- Auglýsing -
