- Auglýsing -
- Elín Jóna Þorsteinsdóttir, Steinunn Hansdóttir og samherjar í Vendsyssel töpuðu í gærkvöld fyrir Nyköbing í dönsku úrvalsdeildinni í handknattleik, 32:24, á útivelli. Elín Jóna varði fjögur skot, þar af eitt vítakast, í marki Vendsyssel þann tíma sem hún var í marki liðsins. Það gerði um 19% hlutfallsmarkvörslu. Steinunn skoraði tvö mörk í fimm skotum. Því miður þá situr Vensdsyssel eitt og yfirgefið í botnsæti deildarinnar með eitt stig eftir 14 leiki og ljóst að heldur syrtir í álinn hjá liðinu.
- Niklas Landin, markvörður danska landsliðsins og Evrópumeistara THW Kiel er með lausan samning við félagið í vor. Hann segist vilja vera áfram hjá Kiel en hinsvegar hafi engar viðræður átt sér stað á milli hans og forsvarsmanna félagsins um framhaldið.
Staðfest var í gær að Henrik Toft Hansen mun ekki leika með danska landsliðinu á HM. Hann hefur verið veikur af kórónuveirunni síðan rétt eftir jólin og hefur alls ekki náð sér sæmilega ennþá. Benjamin Jakobsen, línumaður Aalborg Håndbold, hefur verið kallaður inn í danska liðið í stað Hansen. Vegna þessa mun danska landsliðið fara á stórmót í fyrsta sinn í meira en áratug án þess að annar hvor Toft Hansen bræðranna sé í hópnum.
- Gábor Danyi heldur ekki áfram þjálfun ungverska stórliðsins Györi eftir að núverandi leiktíð lýkur. Félagið greindi frá þessu í tilkynningu. Danyi er nú á sínu þriðja keppnistímabili sem þjálfari Györi sem varð Evrópumeistari 2019, síðast þegar leikið var til úrslita í Meistaradeild Evrópu. Hann var áður aðstoðarmaður Ambos Martín um árabil. Martín, sem rekinn var úr starfi landsliðsþjálfara rússneska kvennalandsliðsins áður en EM í síðasta mánuði var lokið, er orðaður við endurkomu til Györi. Einnig hefur Gábor Elek þjálfari FTC verið nefndur til sögunnar. Györi ætlar að tilkynna um ráðningu nýs þjálfara í næsta mánuði.
- Leik Svía og Svartfellinga sem fram átti að fara í Eskilstuna á laugardaginn í undankeppni EM í handknattleik karla hefur verið frestað eitthvað fram eftir árinu eins og fyrri leiknum sem fram átti að fara í Svartfjallalandi í gærkvöld. Ástæða frestunarinnar er nokkuð kunnugleg, kórónuveiran.
- Elohim Prandi hefur neyðst til þess að draga sig út úr franska landsliðinu fyrir HM í Egyptalandi vegna meiðsla í öxl. Jean-Jacques Aquivillo leikmaður Nimes hleypur í skarðið fyrir Prandi.
- Marinko Kurtovic sem þjálfað hefur norska úrvalsdeildarliðið ÖIF Arendal síðustu sjö ár hefur sagt starfi sínu lausu. Kom ákvörðun hans mjög á óvart því undir hans stjórn hefur Arendal komist í allra fremstu röð handknattleiksliða í karlaflokki í Noregi á nokkrum árum.
- Auglýsing -