- Auglýsing -
- Teitur Örn Einarsson skoraði fjögur mörk í sjö skotum þegar lið hans, Flensburg, vann Bergischer HC, 29:24, í þýsku 1. deildinni í handknattleik í gærkvöld. Arnór Þór Gunnarsson skoraði þrjú mörk, þar af eitt úr vítakasti auk einnar stoðsendingar, fyrir Bergischer sem var yfir í hálfleik, 13:12. Flensburg er komið upp í fjórða sæti deildarinnar með 18 stig að loknum 12 leikjum. Bergischer situr í 13. sæti af 18 liðum með 10 stig eftir 14 leiki.
- Viktor Gísli Hallgrímsson og félagar í GOG halda sínu striki í dönsku úrvalsdeildinni í handknattleik. Þeir unnu Skjern í hörkuleik á heimavelli í gær, 30:29. Viktor Gísli lék hluta leiksins í marki GOG og varði fjögur skot, 31%. GOG er efst og taplaust í deildinni eftir 13 umferðir með 25 stig. Aalborg er fjórum stigum á eftir.
- Aalborg vann bikarmeistara Mors-Thy í gær, 36:32, á úitvelli. Aron Pálmarsson er ennþá frá keppni vegna höfuðhöggs sem hann varð fyrir í leik við Ribe Esbjerg fyrir hálfum mánuði. Arnór Atlason er aðstoðarþjálfari Aalborg.
- Arnar Birkir Hálfdánsson skoraði sex mörk og átti fimm stoðsendingar þegar EHV Aue tapaði naumlega á heimavelli fyrir Eintracht Hagen, 32:31, í þýsku 2. deildinni í gær. Sveinbjörn Pétursson varði níu skot, 27% markvarsla, í marki Aue sem er í 18. og þriðja neðsta sæti deildarinnar með átta stig eftir 15 leiki. Hagen er í þriðja sæti.
- Haukur Þrastarson skoraði fimm mörk og Sigvaldi Björn Guðjónsson eitt þegar lið þeirra Vive Kielce vann Piotrkowianin Piotrkow, 38:32, á útivelli í pólsku úrvalsdeildinni í gær. Kielce hefur unnið 12 fyrstu leiki sína í deildinni og er efst.
- Auglýsing -
