Molakaffi: Teitur Örn, Mayonnade, Tijsterman, Cadenas, Milano, tvíburabræður

Teitur Örn Einarsson, leikmaður IFK Kristianstad. Ljósmynd/IFK Kristianstad
  • Teitur Örn Einarsson og félagar í IFK Kristianstad komust í gærkvöld í átta liða úrslit sænsku bikarkeppninnar í handknattleik. Þeir unnu Skånela með fimm marka mun, 31:26, í síðari leik liðanna í Kristianstad í gærkvöld. Skånela vann fyrri leikinn með eins marks mun, 25:24. Næsti leikur Kristianstad verður á móti IFK Redbergslid annarri umferð sænsku úrvalsdeildarinnar á föstudagskvöld. 
  • Emmanuel Mayonnade sem hefur stýrt hollenska kvennalandsliðinu frá ársbyrjun 2019 hefur sagt starfi sínu lausu og tekur uppsögnin gildi nú þegar. Innan við þrír mánuðir eru þangað til flautað verður til leiks á heimsmeistaramótinu í handknattleik kvenna sem haldið verður á Spáni. Hollendingar eru ríkjandi heimsmeistarar. 
  • Vonbrigði yfir slökum árangri á Ólympíuleikunum í Tokýó í sumar er meginástæða þess að Mayonnade segir upp starfinu. Hann er þjálfari franska liðsins Metz. Monique Tijsterman þjálfar hollenska liðið fyrir heimsmeistaramótið sem stendur fyrir dyrum.
  • Hinn þrautreyndi þjálfari Manolo Cadenas hefur ákveðið að láta staðar numið með argentínska landsliðið í handknattleik karla eftir fjögur ár í brúnni. Undir hans stjórn hefur argentínska landsliðið tekið miklum framförum og m.a. tvisvar sinnum unnið Suður-Ameríkukeppnina, tekið þátt í Ólympíuleikunum í Tókýó auk þess að hafna í 11. sæti í á HM í Egyptalandi í janúar sem er besti árangur sem argentínskt landslið hefur náð á heimsmeistaramóti. Guillermo Milano, sem verið hefur Cadenas, tekur við þjálfun landsliðsins á skammtímasamningi sem gildir fram yfir undankeppni HM í byrjun næsta árs. 
  • Frönsku tvíburabræðurnir Kevin og Olivier Nyokas hafa gengið til liðs við Vardar Skopje eftir skamma veru hjá RK Metalurg, svo stutta að þeir náðu ekki opinberum kappleik fyrir félagið. Þeir skrifuðu undir samning til eins árs við Vardar.
- Auglýsing -

Nýjustu fréttir

- Auglýsing -