Molakaffi: Viktor, Aron, Sandra, Elliði, Örn, Anton, Arnar, Sveinbjörn, Orri, Aron, Axel, Hannes, Haukur

Viktor Gísli Hallgrímsson landsliðsmarkvörður og leikmaður GOG. Mynd/Hafliði Breiðfjörð
  • Íslendingaliðin Aalborg Håndbold og GOG mætast í úrslitum dönsku bikarkeppninnar í handknattleik karla í dag. Aalborg vann ríkjandi bikarmeistara Mors Thy, 34:25, í undanúrslitum i gær og GOG lagði Bjerringbro/Silkeborg, 35:26. 
  • Aron Pálmarsson skoraði þrjú mörk og átti eina stoðsendingu í sigurleik Aalborg í gær. 
  • Sandra Erlingsdóttir skoraði fjögur mörk, þar af þrjú úr vítaköstum, í kveðjuleik sínum með EH Aalborg í dönsku 1. deildinni í handknattleik í gær. EH Aalborg vann AGF, 31:20, og hafnaði í 5. sæti deildarinnar sem er lakara en á síðasta tímabili þegar liðið var á meðal þriggja efstu og komst í umspil um sæti í úrvalsdeild. 
  • Elliði Snær Viðarsson skoraði þrjú mörk og var einu sinni vísað af leikvelli þegar Gummersbach vann Hüttenberg, 30:27, í þýsku 2. deildinni í gær. Leikið var á heimavelli Hüttenberg.  Gummersbach er í efsta sæti deildarinnar með 40 stig eftir 25 leiki og hefur tveggja stiga forskot á Nordhorn. HammWestafalen er í þriðja sæti, fimm stigum á eftir Gummersbach. 
  • Örn Vésteinsson Östenberg skoraði tvö mörk og átti fjórar stoðsendingar fyrir lið TV Emsdetten þegar liðið tapaði á heimavelli fyrir Lübeck-Schwartau, 30:26, á heimavelli í gær í þýsku 2. deildinni. Anton Rúnarsson kom lítið við sögu í liði Emsdetten sem er í 17. sæti af 20 liðum deildarinnar. Þrjú falla niður úr deildinni í vor. 
  • Arnar Birkir Hálfdánsson skoraði eitt mark fyrir EHV Aue er liðið tapaði fyrir Bietigheim, 29:27, í þýsku 2. deildinni. Leikið var í Aue. Sveinbjörn Pétursson stóð í marki EHV Aue í nærri 20 mínútur og varði þrjú skot, 25%. EHV Aue er í 19. og næst síðasta sæti. 
  • Orri Freyr Þorkelsson skoraði eitt mark og Aron Dagur Pálsson ekkert þegar Elverum vann Arendal, 30:25, á útivelli í norsku úrvalsdeildinni í handknattleik í gær. Þetta var 24. sigur Elverum í jafnmörgum leikjum í deildinni. Liðið er með 13 stig forskot á Drammen sem er í öðru sæti. 
  • Hannes Jón Jónsson og lærisveinar hans í Alpla Hard eru komnir í undanúrslit í austurrísku bikarkeppninni í handknattleik eftir sigur á Krems í gær, 26:20.  Hannes Jón tók fram skóna og lék með Hard-liðinu síðustu 20 mínútur leiksins. Nokkrir leikmenn liðsins eru fjarverandi vegna covidveikinda og þar af leiðandi varð þjálfari að taka þátt. Hannes Jón reiknar með að vera til taks í tveimur næstu leikjum liðsins, á miðvikudaginn og á laugardaginn. Eftir það verða væntanlega allir leikmenn á ný klárir í slaginn.
  • Aðalsteinn Eyjólfsson stýrði Kadetten Schaffhausen til sigur á HC Kriens, 33:29, í svissnesku A-deildinni í handknattleik í gær, 33:29. Sem fyrr er Kadetten með yfirburði í deildinni.
     
  • Axel Stefánsson og liðsmenn hans í Storhamar standa höllum fæti eftir tap á heimavelli, 33:31, fyrir Viborg í fyrri viðureign liðanna í átta liða úrslitum Evrópudeildarinnar í handknattleik kvenna í gær. Leikið var í Hamri. Síðari leikurinn fer fram á Jótlandi eftir viku. 
  • Haukur Þrastarson skoraði tvö mörk í gær þegar Vive Kielce vann MMTS Kwidzyn, 35:23, í pólsku úrvalsdeildinni í handknattleik. Vive Kielce er sem fyrr efst í deildinni eftir 20 leiki með fullt hús stiga. 
- Auglýsing -

Nýjustu fréttir

- Auglýsing -