- Auglýsing -
- Viktor Gísli Hallgrímsson varði 15 skot, 34% markvarsla, þegar lið hans GOG vann annan leik sinn í úrslitakeppni dönsku úrvalsdeildarinnar í handknattleik í gær 33:30 gegn Bjerringbro/Silkeborg á heimavelli. GOG stendur þar með afar vel að vígi í riðli eitt í átta liða úrslitum sem fram fara í tveimur riðlum.
- Ágúst Elí Björgvinsson kom lítið við sögu þegar Kolding gerði jafntefli við Nordsjælland, 26:26, í keppni liðanna í neðri hluta deildarinnar þar sem fimm lið eru saman í riðli í von um að forðast fall úr deildinni.
- Viktor Petersen Norberg skoraði níu mörk og Óskar Ólafsson eitt mark þegar lið þeirra, Drammen, vann Nærbö, 30:27, í fyrri undanúrslitaleik Evrópubikarkeppninnar í handknattleik karla í gær. Leikið var í Drammen. Síðari leikurinn fer fram eftir viku.
- Lærisveinar Hannesar Jóns Jónssonar í Alpla Hard unnu Handball Tirol, 26:25, á heimavelli í fyrstu viðureign liðanna í 8-liða úrslitum í austurrísku 1. deildinni í handknattleik í gær. Liðin mætast öðru sinni á miðvikudaginn en vinna þarf tvo leiki til þess að fara í undanúrslit.
- Haukur Þrastarson skoraði tvö mörk og var einu sinni vísað af leikvelli þegar lið hans, Vive Kielce, vann Unia Tarnow, 51:19, í pólsku úrvalsdeildinni í handknattleik í gær. Kielce er sem fyrr efst og ósigrað í pólsku úrvalsdeildinni.
- Pólska liðið Wisla Plock gaf frá sér að vera gestgjafi úrslitahelgar Evrópudeildarinnar í handknattleik karla. Forráðamenn félagsins telja sig ekki hafa fjárhagslegt bolmagn til að standa undir keppninni.
- Auglýsing -
