- Auglýsing -
- Viktor Gísli Hallgrímsson og samherjar í GOG leika til úrslita um danska meistaratitilinn í handknattleik við ríkjandi meistara Aalborg. GOG vann Skjern í oddaleik í undanúrslitum í gær, 34:29. Viktor Gísli kom ekkert í mark GOG í leiknum. Fyrsti úrslitaleikur GOG og Aalborg verður á heimavelli deildarmeistaranna, GOG, á miðvikudaginn.
- Alexander Petersson skorað fjögur mörk og Arnar Freyr Arnarsson þrjú þegar lið þeirra, Melsungen, vann Bergischer HC með sjö marka mun, 31:24, í þýsku 1. deildinni í handknattleik í gær. Arnór Þór Gunnarsson skoraði tvö mörk úr vítaköstum fyrir Bergischer sem situr í 13. sæti. Melsungen er í áttunda sæti.
- Tumi Steinn Rúnarsson skoraði þrjú mörk og átti fjórar stoðsendingar í naumu tapi Coburg á heimavelli fyrir Eisenach, 26:25, í þýsku 2. deildinni í handknattleik í gær. Coburg er í 11.sæti af 20 liðum fyrir lokaumferðina.
- Elliði Snær Viðarsson skoraði fimm mörk og var einu sinni vísað af leikvelli þegar Gummersbach vann öruggan sigur á Ferndorf, 32:28, á útivelli í þýsku 2. deildinni í handknattleik í gær. Gummersbach hefur fyrir löngu unnið deildina en Ferndorf er í fallhættu fyrir lokaumferðina.
- Krems varð í gærkvöld austurrískur meistari í handknattleik eftir að hafa unnið lærisveina Hannesar Jóns Jónssonar í Alpla Hard, 28:26, í síðari úrslitaleik liðanna á heimavelli í gærkvöld. Alpla Hard vann titilinn fyrir ári. Krems varð síðast meistari fyrir þremur árum.
- Orri Freyr Þorkelsson skoraði þrjú mörk þegar Elverum vann Arendal öðru sinni, 35:29, í úrslitakeppni norsku úrvalsdeildarinnar í handknattleik í gærkvöld. Leikurinn fór fram á heimavelli Arendal. Aron Dagur Pálsson skoraði ekki mark fyrir Elverum sem vantar einn sigur til viðbótar til að vinna úrslitakeppnina. Næsti leikur liðanna verður í Elverum á miðvikudagskvöld.
- Auglýsing -
