- Auglýsing -
- Viktor Gísli Hallgrímsson fékk ekki að láta ljós sitt skína í gær í marki GOG þegar liðið vann Skjern, 29:24, á útivelli í dönsku úrvalsdeildinni í handknattleik. Viktor Gísli fékk tækifæri til að verja eitt vítakast en kom að öðru leyti ekkert við sögu. GOG er efst í deildinni með 35 stig að loknum 18 leikjum og er með átta stiga forskot á Aalborg Håndbold.
- Arnar Birkir Hálfdánsson skoraði þrjú mörk í sex skotum og átti sjö stoðsendingar þegar lið hans, EHV Aue, tapaði með eins marks mun á heimavelli fyrir Hüttenberg í þýsku 2. deildinni í gær. Sveinbjörn Pétursson stóð í marki Aue í tíu mínútur og gerði það gott, varði 5 skot, 55%. Áki Egilsnes, fyrrverandi leikmaður KA, skoraði eitt marki fyrir Aue-liðið og átti eina stoðsendingu.
- Austurríska stórskyttan Nikola Bilyk hefur framlengt samning sinn við þýska meistaraliðið THW Kiel. Nýi samningurinn gildir fram á mitt árið 2024. Bilyk kom til Kiel fyrir sex árum.
- IK Sävehof varð í gær sænskur bikarmeistari í handknattleik karla eftir jafntefli við Lugi, 27:27, í síðari úrslitaleik liðanna í keppninni. IK Sävehof vann fyrri leikinn með sjö marka mun, 37:30.
- Sænski landsliðsmaðurin Felix Claar kveður danska meistaraliðið Aalborg Håndbold sumarið 2023 og gengur til liðs við SC Magdeburg í Þýskalandi ef marka má óstaðfestar fregnir frá Þýskalandi. Claar lék stór hlutverk í sænska landsliðinu sem varð Evrópumeistari um síðustu helgi.
- Jorge Dueñas de Galarza var í gær ráðinn þjálfari kvennalandsliðs Slóvakíu í handknattelik. De Galarza þjálfaði spænska kvennalandsliðið frá 2007 til 2017 er hann tók við brasilíska landsliðinu. Hann hætti störfum með brasilíska kvennalandsliðið eftir Ólympíuleikana í Tókýó í ágúst.
- Auglýsing -
