Molakaffi: Viktor Gísli, Daníel Þór, Janus Daði, Valsmenn

Viktor Gísli Hallgrímsson markvörður GOG. Mynd/GOG
  • Viktor Gísli Hallgrímsson fékk ekki að verja mark GOG lengi í gær þegar liðið vann Ribe-Esbjerg, 39:30, í upphafsleik liðanna í dönsku úrvalsdeildinni. Leikið var á heimavelli GOG. Viktor Gísli varði tvö af þeim sex skotum sem bárust á markið þann tíma sem hann stóð vaktina. Danski landsliðsmaðurinn Mathias Gidsel var atkvæðamikill í liði GOG. Gidsel skoraði átta mörk í níu skotum og átti fimm stoðsendingar.
  • Í hinum leik gærkvöldsins í dönsku úrvalsdeildinni í karlaflokki vann Fredericia óvæntan sigur á Bjerringbro/Silkeborg, 28:26.
  • Daníel Þór Ingason fór á kostum þegar lið hans Balingen vann Göppingen, 30:23, í æfingaleik í gærkvöld á heimavelli Balingen. Daníel Þór kom til félagsins í sumar frá Ribe-Esbjerg. Oddur Gretarsson var ekki á meðal þeirra sem skoraði fyrir Balingen í leiknum. Þetta var síðasti æfingaleikur liðanna áður en alvaran hefst í þýsku 1. deildinni eftir viku.
  • Janus Daði Smárason lék með Göppingen í leiknum gegn Balingen. Var þetta fyrsti kappleikur Janusar Daða síðan hann tók þátt í fyrstu viðureign íslenska landsliðsins gegn Portúgal á HM í Egyptalandi í janúar. Eftir leikinn varð Janus Daði að draga sig úr landsliðshópnum vegna meiðsla. Fór hann í framhaldinu í aðgerð á hægri öxl í Stuttgart í byrjun í febrúar. Síðan hefur Janus Daði unnið að endurhæfingu sem skilaði honum út á völlinn í gærkvöld. Janus Daði skoraði eitt mark.
  • Íslandsmeistarar Vals í handknattleik karla komu seint í gærkvöld til Porec í Krótaíu eftir hálfs annars klukkustundar ferðalag í langferðabíl frá Feneyjum. Flogið var frá Keflavík til Barcelona og þaðan frá til Feneyja á Ítalíu. Æft verður í keppnishöllinni í Porec í dag klukkan 15. Leikirnir tveir við RK Porec í 1. umferð Evrópudeildarinnar verða á morgun og á laugardag.
- Auglýsing -

Nýjustu fréttir

- Auglýsing -