- Auglýsing -
- Viktor Gísli Hallgrímsson og samherjar í GOG tryggðu sér sæti í átta liða úrslitum dönsku bikarkeppninnar í gærkvöld með öruggum sigri á Ringsted, 32:28, á útivelli. Grunnur að sigrinum var lagður í fyrri hálfleik en að honum loknum var GOG með átta marka forskot, 18:10. Viktor Gísli fékk því miður ekkert að spreyta sig í leiknum. Norski landsliðsmarkvörðurinn Thorbjörn Bergerud kom til félagsins í sumar stóð vaktina í markinu frá upphafi til enda. Fyrsti leikur GOG í dönsku úrvalsdeildinni verður á heimavelli gegn Ribe-Esbjerg miðvikudaginn 1. september.
- Orri Freyr Þorkelsson skoraði fimm mörk þegar Noregsmeistarar Elverum unnu stórsigur á LFH09 Lillehammer Faaberg Håndball, 47:25, í gærkvöld. Leikið var á heimavelli Lillehammerliðsins, Jorekstad idrettshall.
- Lárus Gunnarsson þjálfari Bergsøy og leikmenn hans unnu öruggan sigur á heimavelli gegn Spjelkavik í þriðju umferð norsku bikarkeppninnar í gærkvöld, 27:20.
- Aðalsteinn Eyjólfsson og leikmenn hans í Kadetten unnu þýska liðið Stuttgart, sem Viggó Kristjánsson leikur með, 37:36, í æfingaleik í Sviss í gær. Allar flóðgáttir opnuðust í fyrri hálfleik í leiknum og alls voru skoruð 42 mörk, þar af skoraði Stuttgart 23 mörk. Kadetten leikur ekki fleiri æfingaleiki á tímabilinu. Næst sækir það serbneska liðið Vojvodina heim í fyrstu umferð Evrópudeildarinnar á sunnudag. Verður það fyrri viðureign liðanna.
- Auglýsing -
