- Auglýsing -
- Króatinn Igor Vori hefur verið ráðinn þjálfari þýska liðsins TV Großwallstadt. Vori er einn þekktasti handknattleiksmaður Króata á þessari öld. Hann lagði skóna á hilluna fyrir fjórum árum að því undanskildu að hann tók þá fram í mars og hljóp í skarðið hjá Füchse Berlin þegar liðið átti engan línumann eftir ómeiddan.
- Vori þjálfaði RK Zagreb í heimalandi sínu um skeið árið 2020 en hefur síðan lítt komið nærri þjálfun. Mesta basl hefur verið á TV Großwallstadt á síðustu árum og var liðið m.a. nærri því fallið úr 2. deild í vor. Vori á að leiða endurreisn þessa forna stórliðs.
- Tvö færeysk lið fóru heim með gullverðlaun frá Partille cup mótinu i Gautaborg sem lauk síðdegis í gær. 11 og 13 ára lið frá H71 í Hoyvík unnu og 11 ára lið stúlkna frá Neistanum í Þórshöfn hafnaði í öðru sæti. Mikil gróska virðist um þessar mundir í handknattleik í Færeyjum og skemmst er að minnast þess að U20 ára landslið karla hefur staðið sig frábærlega á EM í Porto. Liðið leikur úrslitaleik við Ungverja í dag um sæti í átta liða úrslitum.
- Spánverjar unnu gullverðlaun í karla- og kvennaflokki í handknattleik á Miðjarðarhafsleikunum sem lauk fyrir helgina. Spánverjar sendu ungt og fremur óreynt lið til leiks í karlaflokki en tókst að fara taplausir í gegnum mótið og vinna Egypta, 28:27, í úrslitaleik. Afríkumeistararnir voru með sterkt lið á leikunum. Af helstu stjörnum Egypta var Yahia Omar nánast sá eini sem ekki var með. Serbar unnu Norður Makedóníumenn, 34:29, í leiknum um þriðja sætið.
- Spænska kvennalandsliðið vann það króatíska, 29:25, í úrslitaleik í kvennaflokki á Miðjarðarhafsleikunum í Alsír. Serbía hafði betur á móti Portúgal í leik um bronsið, 26:22.
- Afríkumót karla í handknattleik hefst í Kaíró á morgun og lýkur mánudaginn 18. júlí. Þar verður leikið um fimm sæti á heimsmeistaramótinu sem fram fer í Póllandi og Svíþjóð í janúar. Að Afríkumótinu loknu liggur fyrir hvaða 32 þjóðir senda lið til leiks á HM.
- Allskyns vandræði hafa komið upp við að koma Afríkumótinu á dagskrá og hefur því verið frestað ofar en einu sinni vegna erja af ýmsu tagi. M.a. var mótahaldið tekið af Marokkómönnum og flutt til Egyptalands til þess að bera klæði á vopnin í landamæraerjum þriggja ríkja sem og hótunum tveggja þeirra að taka ekki þátt í mótinu.
- Auglýsing -
