- Auglýsing -
- Hinn þrautreyndi þjálfari Veselin Vujovic er að taka við þjálfun króatíska kvennaliðsins Podravka Vegeta. Ekki er langt síðan Vujovic var sagt upp störfum hjá karlaliði Vardar í Skopje. Podravka hefur verið sterkasta kvennalið í Króatíu um árabil og tekur m.a. þátt í Meistaradeild Evrópu.
- Danska handknattleiksfélagið Vendsyssel Håndbold er gjaldþrota, eftir því sem fram kemur í dönskum fjölmiðlum. Elín Jóna Þorsteinsdóttir, landsliðsmarkvörður lék um árabil með Vendsyssel Håndbold í 1. deildinni en flutti sig um set á síðasta sumri. Engan bilbug er að finna á stjórnendum félagsins þrátt fyrir brotsjó í rekstrinum. Þeir ætla sér rakleitt af stað á ný.
- Ekkert verður úr því að Daníel Þór Ingason, landsliðsmaður, og félagar í Balingen-Weilstetten leiki við N-Lübbecke á fimmtudagskvöld í þýsku 1. deildinni. Smit kórónuveiru er komið upp í herbúðum Balingen.
- Tumi Steinn Rúnarsson skoraði ekki mark fyrir Coburg en átti þrjár stoðsendingar og var einu sinni vísað af leikvelli þegar liðið tapaði fyrir Grosswallstadt, 30:29, í þýsku 2. deildinni í handknattleik.
- Eftir að hafa leikið 84 leiki í röð án taps í deildarkeppninni í Portúgal beið Porto lægri hlut fyrir Benfica, 36:33, í Lissabon á sunnudagskvöld.
- Þýska landsliðskonan Amelie Berger leikur ekki handknattleik með Þýskalandsmeisturum Dortmund næstu mánuði eftir að hafa slitið krossband í hné á dögunum. Hún fer í aðgerð til að fá bót meina sinna í Köln á morgun, eftir því sem fram kemur í tilkynningu frá Dormundliðinu í gær.
- Auglýsing -
