Molakaffi: Ýmir Örn, Daníel Þór, Heiðmar, Team Danmark

Ýmir Örn Gíslason leikmaður Rhein-Neckar Löwen. Mynd/Rhein-Neckar Löwen
  • Ýmir Örn Gíslason og félagar í Rhein-Neckar Löwen eru að ná sér á strik í þýsku 1. deildinni eftir erfiða byrjun í haust. Þeir unnu annan leik sinn í röð í gærkvöld er þeir lögðu Balingen, 34:23, á heimavelli. Ýmir Örn skoraði ekki mark, ekki fremur en Daníel Þór Ingason liðsmaður Balingen. Báðir komu þeir mikið við sögu í varnarleiknum og voru til að mynda sendir í kælingu í tvær mínútur.
  • Rhein-Neckar er komið upp í sjöunda sæti deildarinnar með 9 stig eftir 8 leiki. Balingen er sem fyrr í 17. og næst neðsta sæti með fjögur stig en hefur lokið níu leikjum. Oddur Gretarsson lék ekki með Balingen. Hann er enn í endurhæfingu eftir að hafa farið í aðgerð á hné í sumar.
  • Hannover-Burgdorf, þar sem Heiðmar Felixson er aðstoðarþjálfari, vann GWD Minden, 30:29, á heimavelli. Hannover-Burgdorf er komið upp í 13. sæti með sex stig að loknum átta leikjum.
  • Danska handknattleikssambandið fékk í gær 500.000 danskar krónur, jafnvirði 10 milljóna króna, greiðslu frá Team Danmark vegna silfurverðlauna karlalandsliðsins á Ólympíuleikunum í sumar. Peningarnir skiptast jafnt niður á leikmenn liðsins. Þetta er aukagreiðsla frá Team Danmark sem greiðir öllum verðlaunahöfum Dana á Ólympíuleikunum ákveðna upphæð eftir því hvort þeir hljóta gull, silfur eða brons. Alls greiddi Team Danmark út 2,1 milljón danskra króna í gær í verðlaun til danskra íþróttamanna vegna árangurs þeirra á leikunum, ríflega 42 milljónir króna.
- Auglýsing -

Nýjustu fréttir

- Auglýsing -