Moustafa hefur svarað

Hassan Moustafa forseti Alþjóða handknattleikssambandsins. Mynd/EPA

Hassan Moustafa, forseti Alþjóða handknattleikssambandsins IFH, hefur svarað bréfi sem Evrópsku leikmannasamtökin sendu honum í gær þar sem lýst er þungum áhyggjum vegna þess að til stendur að selja þúsundum áhorfenda aðgang að leikjum heimsmeistaramótsins sem fram fer í Egyptalandi og hefst á miðvikudaginn. Er þess óskað að frá ákvörðuninni verði horfið.


Moustafa segir í svari sínu að áhyggjur leikmanna vegna þessa máls hafi ekki farið framhjá honum. Hann segir ennfremur að málið verði tekið fyrir á fundi hans með forsætisráðherra og heilbrigðisráðherra Egyptalands á sunnudaginn. Moustafa segist vilja tryggja að óskir leikmanna verði skoðaðar af yfirvegun áður en endanleg ákvörðun verður tekin varðandi áhorfendur á leiki mótsins. Auk þess hafi það alla tíð verið forgangsmál af hálfu IHF að tryggja öryggi keppenda mótins.


Moustafa segir að á mánudaginn greini IHF frá niðurstöðu þessa máls.


Eins og áður hefur komið fram er það ætlan skipuleggjenda heimsmeistaramótsins að selja í allt að fimmtung sæta í hverri keppnishöll sem leikið verður sem þýðir að í stærstu höllinni sem leikið verður í geta rúmast allt að 3.400 áhorfendur. Í keppnishöll íslenska landsliðsins verða samkvæmt þessu að hámarki 1.500 áhorfendur á leik.

- Auglýsing -

Nýjustu fréttir

- Auglýsing -