Igor Mrsulja, nýr leikmaður Gróttu, og Patrekur Jóhannesson, þjálfari karlaliðs Stjörnunnar hefja keppnistímabilið í Olísdeildinni í leikbanni.
Mrsulja var úrskurðaður í tveggja leikja bann á fundi aganefndar HSÍ í gær. Patrekur fékk eins leiks bann og verður fjarri góðu gamni þegar Stjarnan sækir Aftureldingu heim á föstudaginn.
Mrsulja fékk útilokun fyrir óíþróttamannslega framkomu á síðustu sekúndum viðureignar Gróttu og Stjörnunnar í 16-liða úrslitum Coca Cola-bikars karla er hann sló Þórð Tandra Ágústsson línumann Stjörnunnar.
Mrsulja missir af leik Gróttu og Vals í fyrstu umferð Olísdeildar annað kvöld og verður ekki með í viðureign Gróttu við FH í Kaplakrika á fimmtudaginn eftir rúma viku.
Patreki þjálfara Stjörnunnar rann í skap þegar Mrsulja sló Þórð Tandra og uppskar rautt spjald hjá dómurum leiksins fyrir að fara yfir strikið er hann lýsti óánægju sinni.
Einar Sindri Ólafsson, leikmaður Mílunnar, Fjölnismaðurinn Elvar Þór Ólafsson, Stjörnumaðurinn Hafþór Vignisson og FH-ingurinn Ísak Rafnsson sem allir hlutu útilokun vegna leikbrota í leikjum í átta liða úrslitunum á mánudagskvöld sleppa við leikbann. Þeir eru minntir á í úrskurði Aganefndar, sem birtur var í dag, á stighækkandi áhrifum útilokana vegna brota af þessu tagi sem lesa má nánar um hér í úrskurði aganefndar HSÍ.
