KA/Þór braut blað í sögu sinni í gær og varð fyrsta liðið frá Akureyri til þess að leika úrslitaleik um Íslandsmeistaratitilinn í handknattleik kvenna. Deildarmeistarar KA/Þórs gerði sér lítið fyrir og gerði gott betur en að taka þátt í leiknum. Það vann leikinn með þriggja marka mun, 24:21, í rífandi góðri stemningu og flottri umgjörð í KA-heimilinu.
Liðin mætast öðru sinni í Origohöll Valsara á sunnudaginn klukkan 15.45. Vinni KA/Þór þá viðureign verður liðið Íslandsmeistari í fyrsta sinn. Takist Val að vinna og jafna metin í einvíginu kemur til oddaleiks í KA-heimilinu á miðvikudagskvöld.
Egill Bjarni Friðjónsson var að vanda með myndavélina á lofti eins og í öllum öðrum leikjum KA/Þórs á heimavelli á leiktíðinni. Hann deilir hér hluta mynda sinn með lesendum handbolta.is.
Ritstjóri þakkar Agli Bjarna fyrir rausnarlegt framlag sitt til handbolta.is en í dag eru réttir níu mánuðir síðan handbolti.is var opnaður. Frá upphafi hefur vefurinn notið þess að fá framúrskarandi myndapakka frá Agli Bjarna frá öllum heimleikjum kvennaliðs KA/Þórs og karlaliði KA á leiktíðinni.
