- Auglýsing -
Hressilega sauð upp úr í úrslitaleik bikarkeppninnar í handknattleik karla í Túnis á dögunum og létu menn hendur skipta. Virtist ekkert við ráðið um tíma. Lið Espérence de Tunis og Club Africain áttust við en kærleiksblómin spretta ekki upp á milli liðanna. Myndskeið af hasarnum er að finna neðst í þessari frétt.
Gripið var til þess ráðs að fresta leiknum eftir rúmlega tíu mínútur þegar ástandið var komið úr böndum en m.a. slógust leikmenn og stjórnendur félaganna. Lögreglan var við öllu búin og greip hún fljótt í taumana innan vallar.
Til að bæta gráu ofan á svart létu stuðninsmenn beggja liða afar ófriðlega. Köstuðu þeir plastflöskum og öðru lauslegu inn á leikvöllinn. Svöruðu leikmenn í sömu mynt eins og sjá má myndskeiðinu hér fyrir neðan. Fjórir áhorfendur slösuðust í slagsmálunum.
Sem fyrr segir var leiknum slegið á frest. Óvíst er hvenær þráðurinn verður tekinn upp á nýjan leik. Leikmenn og stjórnendur félaganna mega vænta talsverðra sekta auk þess sem talið er líklegt að þegar þráðurinn verður tekinn upp á ný verði leikið fyrir luktum dyrum.
Bagarre entre les deux équipes ! !#ESTCA 🤾♂️ pic.twitter.com/lioHm0yaZ7
— Espérance Time (@EsperanceTime_) May 11, 2022
- Auglýsing -
