Aðalsteinn Eyjólfsson og lærisveinar hans í Kadetten Schaffhausen unnu í kvöld nauman sigur á Bern, 30:29, í fyrstu viðureign liðanna í 8-liða úrslitum svissnesku úrvalsdeildarinnar í handknattleik. Leikið var á heimavelli Kadetten. Næsta viðureign liðanna verður í Bern á fimmtudaginn í næstu viku.
Leikurinn var hnífjafn og æsilega spennandi frá upphafi til enda. Jafnt var að loknum fyrri hálfleik, 13:13. Leikmenn Bern, sem höfnuðu í sjöunda sæti deildarinnar, komust þremur mörkum yfir snemma í síðari hálfleik, 18:15. Heimamönnum tókst að snúa taflinu við og komast yfir 26:24 og aftur 30:28 þegar 16 sekúndur voru til leiksloka. Þær sekúndur sem voru eftir dugðu Bern-liðinu til að klóra í bakkann.
Þótt rúm vika sé fram að næstu viðureign liðanna í átta liða úrslitum þá hafa leikmenn Kadetten og Aðalsteinn þjálfari um nóg að hugsa næstu daga því á laugardaginn leika þeir til úrslita í bikarkeppninni gegn HC Kriens-Luzern.
