Nágranna, – og frændþjóðirnar Danir og Svíar leika til úrslita á heimsmeistaramótinu í handknattleik karla á sunnudaginn. Danir unnu í kvöld Evrópumeistara Spánar, 35:33, í síðari undanúrslitaleik mótsins eftir að hafa verið yfir, 18:16, að loknum fyrri hálfleik. Þetta verður í fyrsta sinn sem Danir og Svíar mætast í úrslitum stórmóts í handknattleik karla.
Danir sem voru með yfirhöndina í leiknum frá upphafi til enda fá þar með tækifæri til þess að verja heimsmeistaratign sína sem þeir unnu eftir sigur á annarri grannþjóð, Noregi, á heimavelli fyrir tvemur árum.
Undanúrslitaleikur Dana og Spánverja var mikil skemmtun þar sem sóknarleikurinn réði ríkjum á kostnað varnarleiksins. Danska liðið var sterkara framan af og hafði m.a. um skeið fimm marka forystu.Spánverjar fengu tækifæri til að jafna metin, 34:34, þegar 20 sekúndur voru til leiksloka en skot af línu hafnaði í slá og frá markinu. Lasse Svan innsiglaði tveggja marka sigur á síðustu sekúndunni.
Mörk Danmerkur: Mikkel Hansen 12, Magnus Saugstrup Jensen 7, Morten Toft Olsen 4, Mathias Gidsel 4, Lasse J. Svan 3, Magnus Landin 2, Emil M. Jakobsen 1, Lasse B. Andersson 1, Simon Hald Jensen 1.
Mörk Spánar: Daniel Dujshebaev 7, Adrian Figueras 6, Jorge Maqueda 5, Alex Dujshebaev 4, Ferran Sole Sala 3, Aleix Gomez Abello 3, Ruben Marchan Criado 3, Aitor Arino Bengoechea 2.
