Leikmenn Bayer Leverkusen hitta nýjan þjálfara þegar þeir koma saman aftur til æfinga um mánaðarmótin. Hildigunnur Einarsdóttir er fyrir miðri neðri röð, númer 18. Mynd/Bayer Leverkusen

Hildigunnur Einarsdóttir og liðsfélagar hennar í þýska 1. deildarliðinu Bayer Leverkusen kynnast nýjum þjálfara þegar þær mæta á næstu æfingu. Félagið tilkynnti í morgun að það hafi ráðið hinn 34 ára gamla Martin Schwarzwald í starf þjálfara liðsins. Tekur hann til starfa í byrjun desember þegar leikmenn mæta aftur eftir tíu daga frí frá æfingum.

Schwarzwald er ekki reyndur þjálfari en við hann eru bundnar talsverðar vonir. Sem stendur þjálfar hann 3. deildar lið TSG Mainz-Bretzenheim. Schwarzwald hefur verið hjá því liði í hálft annað ár og þykir hafa unnið uppbyggingastarf af útsjónarsemi.

Schwarzwald tekur við starfinu af hinum þrautreynda þjálfara Michael Biegler sem hætti fyrirvaralaust hjá Leverkusen á mánudag.

Eins og kom fram í samtali við Hildigunni á handbolta.is í gær þá eru leikmenn Leverkusen komnir í tíu daga frí frá æfingum. Leik liðsins sem fram átti að fara í gærkvöld við Bietigheim var frestað. Það átti að vera síðasti leikur liðanna fyrir hlé á deildarkeppninni vegna EM í handbolta sem stendur til að fari fram í Danmörku í næsta mánuði.

- Auglýsing -

Nýjustu fréttir

- Auglýsing -