Það virðist heldur betur hafa hresst upp á leikmenn danska úrvalsdeildarliðsins Ribe Esbjerg að nýr þjálfari bættist í hópinn í gærmorgun því þeir unnu í kvöld langþráðan sigur í heimsókn sinni til Árósa. Ribe Esbjerg vann Århus Håndbold örugglega, 31:25, eftir að hafa verið tveimur mörkun undir að loknum fyrri hálfleik, 16:14.
Þetta var aðeins í annað sinn á keppnistímabilinu sem Ribe Esbjerg vinnur leik í deildinni. Liðið hefur nú fimm stig að loknum 11 leikjum.
Eftir slæma byrjun og aðeins þrjú stig í 10 leikjum var tilkynnt í gærmorgun að Mathias Madsen kæmi til starfa við hlið þjálfarans Kristian Kristensen í stað þess að fara þá hefðbundnu leið að segja þjálfaranum upp þegar illa gengur. Madsen virðist hafa kveikt í mönnum við komuna til liðsins, svo mjög að á þá rann hamur.
Leikmenn Ribe Esbjerg svöruðu breytingunum með einstaklega góðum leik, ekki síst í fyrri hálfleik.
Rúnar Kárason skoraði fimm mörk í 14 skotum og átti auk þess sex stoðsendingar.
Daníel Þór Ingason sem varla hefur fengið tækifæri í sókninni á leiktíðinni skoraði þrjú mörk í jafnmörgum tilraunum og þakkaði þannig fyrir aukið traust. Einnig átti Daníel Þór eina línusendingu. Honum var einu sinni vísað af leikvelli í tvær mínútur enda umsvifamikill í varnarleik Ribe Esbjerg eins og fyrri daginn.
Þriðji Íslendingurinn í Ribe Esbjerg-liðinu, Gunnar Steinn Jónsson, skoraði tvö mörk í fjórum skotum.
Sören Rasmussen, markvörður Ribe Esbjerg, fór hamförum í markinu í síðari hálfleik og var með 50% hlutfallsmarkvörslu.
Staðan í dönsku úrvalsdeildinni í karlaflokki.
