Bjarki Már Elísson og samherjar í þýska handknattleiksliðinu TBV Lemgo Lippe nýttu daginn í dag til þess að skoða sig um í nágrenni Reykjavíkur. Þeir halda af landi brott í fyrramálið eftir að hafa mætt Íslandsmeisturum Vals í Origohöllinni í gærkvöld og unnið með einu marki, 27:26, eftir talsverðan barning. Leikur liðanna var sá fyrri milli þeirra í 2. umferð Evrópudeildarinnar í handknattleik karla.
Meðal þess sem Bjarki Már og félagar gerðu í dag var að ganga að hraunjaðri elgossins í Geldingadölum undir leiðsögn Hermanns Helgusonar fararstjóra og æskufélaga Bjarka Más. Hermann þekkir gossvæðið nánast eins og lófana á sér enda verið þar með annan fótinn frá því að gosið hófst. Hermann hefur m.a. tekið stórbrotnar myndir og myndskeið af gosinu sem vakið hafa verðskuldaða athygli víða um heim.
„Við fórum nálægt hraunjaðrinum. Það var ekkert hraunrennsli þar sem við komum að en talsverður reykur. Menn voru himinlifandi með ferðina,“ sagði Hermann við handbolta.is í dag um leið og hann veitti góðfúslegt leyfi fyrir birtingu myndarinnar sem fylgir hér með.
