Sigríður Hauksdóttir, leikmaður HK og landsliðskona í handknattleik. Mynd/HK

„Við ætluðum okkur að leika fasta vörn frá upphafi og það tókst. Í kjölfarið fengum við eitthvað af hraðaupphlaupum. Sóknarleikurinn var brösóttur í fyrri hálfleik en var mun betri í síðari hálfleik,“ sagði Sigríður Hauksdóttir, landsliðskona og leikmaður HK, í samtali við handbolta.is eftir tíu marka sigur HK-liðsins á Gróttu í fyrstu viðureign liðanna í umspili um sæti í Olísdeild kvenna á næsta keppnistímabili í Kórnum í gærkvöld.

„Við lékum svona framliggjandi vörn nánast í allan vetur. Hún var kannski aðeins ákveðnari núna en stundum áður. Við náðum að brjóta á milli 40 og 50 sinnum á sóknarmönnum Gróttu í leiknum. Þannig tókst okkur að brjóta sóknarleik Gróttuliðsins á bak aftur. Varnarleikur okkar lagði grunninn að sigrinum,“ sagði Sigríður ennfremur.


Spurð hvort HK eigi ekki sigurinn næsta vísan í annarri viðureign liðanna í Hertzhöll Gróttu á þriðjudagskvöld sagðist Sigríður ekki vilja taka svo djúpt í árinni. „Okkar markmið er hinsvegar alveg skýrt. Við ætlum að vinna á þriðjudaginn. Vonandi tekst það,“ sagði Sigríður Hauksdóttir en hún skoraði fjögur mörk í tíu marka sigri HK, 28:18, í Kórnum í gærkvöld.

- Auglýsing -

Nýjustu fréttir

- Auglýsing -