Okkur eru allir vegir færir

Sunna Jónsdóttir t.h. ásamt Helenu Rut Örvarsdóttur og Hafdísi Renötudóttur markverði. Mynd/Hafliði Breiðfjörð

„Ég er ótrúlega spennt og glöð með að við eigum möguleika á EM sæti. Þótt við séu minna liðið í leiknum þá teljum við okkur hafa alla möguleika,“ sagði hin leikreynda landsliðskona Sunna Jónsdóttir í samtali við handbolta.is í Zrenjanin í Serbíu. Sunna verður í eldlínunni ásamt samherjum sínum í landsliðinu gegn Serbum í dag í úrslitaleik um sæti á Evrópumótinu sem haldið verður í nóvember.


„Mér finnst við hafa tekið framfaraskref á síðustu mánuðum. Ekki síst þess vegna verður gaman að sjá hvað gerist þegar út í alvöruleik verður komið,“ sagði Sunna.


Íslenska liðið þarf að vinna leikinn í dag til þess að komast áfram í lokakeppni EM. Serbum nægir jafntefli. Flautað verður til leiks klukkan 16 í íþróttahöllinni í Zrjenjanin.


„Eftirvæntingin er mikil og vonandi tekst okkur að stilla af spennustigið því stemningin í höllinni á eftir að verða erfið. Höllin er mikil gryfja og ljóst að það verður gríðarlega stemning á leiknum. Við verðum að njóta augnbliksins og spila vel úr okkar,“ sagði Sunna sem er ein þriggja leikmanna hópsins í dag sem tók þátt í lokakeppni EM2010 þegar Ísland náði inn á lokamót í kvennaflokki í fyrsta sinn.


„Okkur eru allir vegir færir. Leikskipulagið er gott og þrátt fyrir tap fyrir Svíum þá gaf leikurinn okkur ákveðið sjálfstraust. Við lentum ekki á vegg í þeim leik. Vissulega er alltaf leiðinlegt að tapa en sænska liðið er bara klassa fyrir ofan okkur. Okkur tókst engu að síður að leysa margt mjög vel, jafnt í vörn sem sókn, nokkuð sem við getum tekið með okkur inn í leikinn í dag,“ sagði Sunna Jónsdóttir landsliðskona í samtali við handbolta.is.


Handbolti.is er í Zrenjanin og fylgist með leiknum í stöðu- og textalýsingu úr kristalshöllinni frá klukkan 16.

- Auglýsing -

Nýjustu fréttir

- Auglýsing -