- Auglýsing -
Eftir tvo tapleiki í röð í deildinni komst IFK Kristianstad inn á sigurbraut í kvöld á heimavelli þegar liðið lagði Aranäs á heimavelli, 28:22, í sænsku úrvalsdeildinni í handknattleik. Kristianstad var tveimur mörkum yfir að loknum fyrri hálfleik. Varnarleikur liðsins tók hinsvegar stakkaskiptum til hins betra í síðari hálfleik. Þar með skildu leiðir.
Teitur Örn Einarsson skoraði fjögur mörk í 11 skotum fyrir Kristianstad auk þess sem hann átti sex stoðsendingar. Ólafur Andrés Guðmundsson, fyrirliði, skoraði þrjú mörk og var með sex markskot. Ólafur átti hinsvegar 11 stoðsendingar sem er hreint fáheyrður fjöldi hjá einum manni í leik.
Kristianstad er í sjöunda sæti með 24 stig eftir 22 leiki og er 11 stigum á eftir Malmö og Ystads IF sem hafa 35 stig og bítast um efsta sætið.
- Auglýsing -
