Öll sund lokast – EHV Aue er fallið

Arnar Birkir Hálfdánsson kveður EHV Aue í lok keppnistímabilsins eftir tveggja ára veru. Mynd/EHV Aue

EHV Aue, sem tveir íslenskir handknattleiksmenn leika með, er fallið í 3. deild í þýska handknattleiknum. Örlög liðsins liggja fyrir eftir að það tapaði fyrir Dormagen, 28:21, á útivelli í þriðju síðustu umferð deildarinnar í kvöld. Aue-liðið hefur 23 stig og getur ekki forðast að vera eitt þriggja liða sem fellur úr deildinni þótt það tæki upp á því að vinna tvo síðustu leiki sína.


Leikmenn Aue hafa róið lífróður síðustu vikur en allt hefur komið fyrir ekki og í leiknum í kvöld áttu þeir ekki möguleika þegar kom fram í síðari hálfleik. Dormagen var tveimur mörkum yfir í hálfleik, 12:10.


Arnar Birkir Hálfdánsson skoraði eitt mark fyrir Aue í leiknum. Færeyingurinn Áki Egilsnes, sem gerði garðinn frægan með KA, skoraði fjögur mörk. Sveinbjörn Pétursson markvörður varði eitt skot.


Aue var í hópi liða í efri hluta deildarinnar fyrir ári og því er fall liðsins á þessu tímabili fremur óvænt.


Elliði Snær Viðarsson skoraði fjögur mörk fyrir Gummersbach þegar liðið vann öruggan sigur á Rimpar Wölfe, 29:23, á heimavelli í kvöld. Gummersbach hefur fyrir nokkru tryggt sér sigur í deildinni og sæti í 1. deild á næstu leiktíð.


Tumi Steinn Rúnarsson og samherjar í Coburg færðust upp í 11. sæti með góðum sigri á Eintracht Hagen, 31:26, á útivelli. Tumi Steinn skoraði ekki mark í leiknum en átti tvær tilraunir.


Hamm-Westfalen, Nordhorn og Hüttenberg er í öðru, þriðja og fjórða sæti og eiga mesta möguleika á að fylgja í kjölfar Gummersbach upp í 1. deild. Eisenach á einnig veika von.

- Auglýsing -

Nýjustu fréttir

- Auglýsing -