Olsson fékk höfuðhögg – gæti misst af undanúrslitaleiknum

Emma Olsson fékk höfuðhögg í leiknum við Hauka á laugardaginn. Mynd/Fram

Óvissa ríkir um þátttöku sænsku handknattleikskonunnar, Emmu Olsson hjá Fram, í undanúrslitaleik Fram og Vals í Coca Cola-bikarnum á næsta fimmtudag. Olsson fékk bylmingsskot í höfuðið eftir um stundarfjórðung í viðureign Hauka og Fram í annarri umferð Olísdeildarinnar í Schenkerhöllinni á laugardaginn.


Olsson kom ekkert meira við sögu í leiknum og eftir því sem næst verður komist mun tíminn að leiða í ljós hvort hún verður klár í slaginn gegn Val á fimmtudagskvöldið.

Emma Olsson á auðum sjó gegn Mateu Lonac markverðir KA/Þórs í Meistarakeppni HSÍ á dögunum. Mynd/Egill Bjarni Friðjónsson


Olsson kom til Fram fyrir keppnistímabilið og átti m.a. að binda vörnina saman í stað Steinunnar Björnsdóttur sem sleit krossaband í hné í vor. Einnig er Olsson sterkur línumaður sem hefur fallið vel inn í leik Framara jafn í vörn sem sókn.


Undanúrslitaleikir kvenna í Coca Cola-bikarnum fara fram á fimmtudaginn. Fram og Valur eigast við klukkan 18 og KA/Þór og FH klukkan 20.30. Sigurliðin leika til úrslita á laugardaginn kl. 13.30. Allir leikirnir fara fram í Schenkerhöllinni á Ásvöllum þar sem Laugardalshöll er ekki nothæf til handknattleiks.


Miðasala á leikina í Coca Cola-bikarnum er hafin á smáforritinu Stubbur.

- Auglýsing -

Nýjustu fréttir

- Auglýsing -