Önnur axlaraðgerð á innan við ári

Magnús Öder Einarsson t.h. í baráttu við Áka Egilsnes í viðureign KA og Selfoss fyrir rúmu ári. Mynd/Egill Bjarni Friðjónsson

Handknattleiksmaðurinn Magnús Öder Einarsson gekkst í gær undir aðra aðgerð á öxl á innan við einu ári. Magnús, sem skipti frá Selfossi yfir til Fram í byrjun ársins, fór í aðgerð á síðasta hausti sem tókst ekki sem skildi. Eftir að hann fór úr axlarlið í viðureign Fram og Stjörnunnar 23. mars var ljóst að ekki væri komist hjá annarri aðgerð.


„Nú á öxlin að verða eins og ný,“ sagði Magnús léttur í bragði við handbolta.is í gærkvöld. Hann reiknar með að það líði fjórir til sex mánuðir þar til hann verður kominn á fulla ferð á nýjan leik.


„Markmiðið er að mæta til leiks aftur í september,“ sagði Magnús sem gekk til liðs við Fram í janúar, eins og áður sagði. Lék hann eingöngu með liðinu í vörninni þangað til óhappið átti sér stað í fyrrnefndum leik við Stjörnuna undir lok mars.


Magnús sagði að fljótlega eftir að hann byrjaði að æfa með Fram í janúar hafi komið í ljós ekki hafi verið allt með felldu í axlarliðnum. Hann hafi átt erfitt með að kasta boltanum. Úr varð að hann lék með í vörninni. Stefnan hafi verið sett á aðgerð í sumar. Aðgerðinni var flýtt eftir að hann fór úr axlarlið í lok mars.


- Auglýsing -

Nýjustu fréttir

- Auglýsing -