Orri Freyr Þorkelsson og samherjar hans í norska meistaraliðinu Elverum gerðu sér lítið fyrir í kvöld og unnu ungversku meistarana, Pick Szeged, 34:30, í Szeged í kvöld í A-riðli Meistaradeildar Evrópu í handknattleik
Þetta var annar sigur Elverum í keppninni á tímabilinu en um leið fyrsta tap ungversku meistaranna sem höfðu fyrir leikinn unnið þrjár fyrstu viðureignir sínar.
Orri Freyr, sem gekk til liðs við Elverum í sumar frá Haukum, skoraði ekki mark í leiknum. Tobias Schjølberg Grøndahl var markahæstur hjá Elverum með níu mörk. Bence Banhidi var markahæstur hjá Szeged með sex mörk.
Í B-riðli keppninnar má segja að allt hafi farið eftir bókinni góðu.
Barcelona vann Dinamo Búkarest, 36:32, í Barcelona. Búkarest-liðið er þjálfað af Xavi Pascual sem er sigursælasti þjálfari í sögu handknattleiksliðs Barcelona. Hann hætti störfum í sumar m.a. vegna þess að forráðamenn Barcelona drógu lappirnar úr hófi við að endursemja við Aron Pálmarsson.
PSG lagði úkraínsku meistarana Motor, 40:32. Savukynas Gintaras fyrrverandi leikmaður Aftureldingar og fleiri liða hér á landi þjálfar úkraínsku meistarana. Roland Eradze er aðstoðþjálfari liðsins.
Loks vann ungverska liði Veszprém liðsmenn Porto með sjö marka mun, 30:23, í Porto.
Staðan í A og B-riðlum Meistaradeildar Evrópu eftir fjórar umferðir.
