Sandra Erlingsdóttir og samherjar hennar í EH Aalborg halda sigurgöngu sinni áfram í dönsku 1. deildinni í handknattleik. Í dag sótti liðið sigur til Óðinsvéa á Fjóni í heimsókn sinni til DHG Odense, 33:26.
EH Aalborg var fimm mörkum yfir að loknum fyrri hálfleik, 16:11, og var í raun með öruggt forskot frá upphafi til enda. Þjálfari liðsins hafði gott tækifæri til þess að gefa öllum leikmönnum liðsins færi á að spreyta sig.
Sandra skoraði tvö mörk að þessu sinni.
EH Aalborg hefur þar með 12 stig að loknum sex leikjum. Hadsten Håndbold, sem Hrafnhildur Ósk Skúladóttir fyrrverandi landsliðsfyrirliði, lék með um skeið fyrir ríflega áratug, er í öðru sæti með 10 stig. Síðan koma Ringköbing Håndbold og Roskilde Håndbold þar skammt á eftir.
DHG-liðið er í níunda sæti af 12 liðum deildarinnar með fjögur stig.
