- Auglýsing -
Nær fullvíst má telja að Viggó Kristjánsson leiki ekki fleiri leiki með íslenska landsliðinu á heimsmeistaramótinu í handknattleik í Egyptalandi. Viggó meiddist á hægri ökkla er hann tók hliðarskref í sókn þegar um fjórar mínútur voru til leiksloka. Hann var studdur af leikvelli.
Eftir því sem handbolti.is kemst næst hér í Dr. Hassan Moustafa íþróttahöllinni í Kaíró þar sem leikur Íslands og Frakklands fór fram í kvöld er ökklinn stokkbólginn og ekki er ósennilegt að eitthvað hafi gefið sig.
Viggó nýtur nú meðferðar hjá lækni og sjúkraþjálfurum íslenska landsliðsins eftir leikinn en afar sennilegt er talið að hann leiki ekki gegn Norðmönnum á sunnudaginn.
Viggó átti stórleik í kvöld og hafði skoraði sjö mörk þegar hann meiddist, öll í síðari hálfleik.
- Auglýsing -
