- Auglýsing -
- Ekkert evrópskt félagslið á eins glæsilega sögu í Meistaradeild Evrópu í handknattleik en Barcelona, liðið sem Aron Pálmarsson leikur með. Aron kemur einmitt talsvert við sögu.
- Barcelona tekur annað kvöld á móti Celje Lasko frá Slóveníu í annarri umferð riðlakeppni Meistaradeildar á heimavelli. Barcelona vann Motor Zaropryzhe í fyrstu umferð fyrir viku, 30:25, í Úkraínu.
- Gangi allt að óskum hjá Aron Pálmarssyni fram að úrslitahelginni á milli jóla og nýárs, sem áður er getið um verður hann fyrsti handknattleiksmaðurinn í sögunni til að taka níu sinnum þátt í úrslitahelgi Meistaradeildarinnar en hún var sett á laggirnar 2010. Hann er um leið aðeins einu marki frá því að hafa skorað 50 mörk í leikjum úrslitahelganna.
- Barcelona hefur unnið 234 leiki í keppninni frá því að henni var komið á laggirnar keppnistímabilið 1993/94. Ekkert annað lið hefur unnið 200 leiki eða fleiri.
- Á þessu keppnistímabili getur Barcelona orðið fyrst félaga til að vinna deildina tíu sinnum. Þegar hefur liðið unnið í átta skipti. Barcelona hefur tryggt sér sæti í undanúrslitum keppninnar fyrir síðasta tímabil. Undanúrslitum og úrslitum var frestað í vor vegna kórónuveirunnar en til stendur að útkljá keppnina á milli jóla og nýárs. Þá er möguleiki á níunda sigrinum og síðan er aldrei að vita hvað gerist í vor ef Barcelona kemst í úrslitahelgi Meistaradeildarinnar sem fram fer í Lanxess-Arena í Köln helgina 12. og 13. júní.
- Barcelona er aðeins 358 mörkum frá því að skora 10.000. markið sitt í Meistaradeildinni. Liðið hefur skorað 799 mörkum fleiri en næsta lið á listanum, THW Kiel. Nærri liggur að leikmenn Barcelona hafi skorað 5% allra marka sem skoruð hafa verið í Meistaradeildinni frá upphafi en þau nálgast hratt 200.000 frá því að fyrsti leikurinn var háður haustið 1993.
- Frá vorinu 1994 hefur Barcelona leikið sextán sinnum í undanúrslitum Meistaradeildar Evrópu í handknattleik, oftar en nokkuð annað félagslið. Þar af hefur það unnið keppnina átta sinnum. Guðjón Valur Sigurðsson er eini Íslendingurinn sem hefur verið í sigurliði Barcelona í Meistaradeild Evrópu. Það gerðist vorið 2015. Síðan hefur Barcelona heldur ekki leikið til úrslita í deildinni.
- Auglýsing -
