„Þorsteinn Leó verður ekki með okkur á sunnudaginn gegn ÍR. Það er alveg ljóst og alveg óvíst hvort hann leikur meira á þessu keppnistímabili,“ sagði Gunnar Magnússon, þjálfari Aftureldingar, við handbolta.is í morgun þegar spurt var frétta af stórskyttunni ungu og efnilegu, Þorsteini Leó Gunnarssyni.
Þorsteinn Leó hlaut slæma byltu í viðureign Aftureldingar og KA í Olísdeildinni að Varmá í gær þegar liðin skildu jöfn. Þorsteinn Leó var fluttur á sjúkrahús til skoðunar þar sem mönnum leist ekki á ástandið á honum eftir byltuna og harkalegt fall.
Gunnar sagði að við rannsókn hafi sem betur fer ekki komið fram brot í bakinu eins og óttast var í fyrstu. „Ástandið er ekki gott á stráknum, því miður. Það getur alveg farið svo að Þorsteinn verði ekki meira með á keppnistímabilinu,“ sagði Gunnar sem er ómyrkur í máli í garð dómara leiksins sem honum þótti ekki standa sig í stykkinu í leiknum að vernda heilsu leikmanna eins og væri uppálagt að gera.
Fleiri leikmenn Aftureldingar eru að minnsta kosti lemstraðir eftir leikinn í gær.
Gunnar sagði að nokkur atvik hafa átt sér stað í leiknum í gær sem hafi ekki verið tekið á af dómurum leiksins, að sínu mati.
„Ég er ekki að ásaka menn um viljaverk en það eru viss atriði sem við viljum taka út úr íþróttinni og dómarar eiga að taka á en því miður vill verða misbrestur á stundum en rétt er taka fram að margir dómarar standa sig vel í þessu. Það er hlutverk dómara að vernda leikmennina og dæma samkvæmt þeim áherslum sem hafa verið kynntar,“ sagði Gunnar Magnússon þjálfari Aftureldingar.
