„Það er lítið að frétta af Salerno leikjunum. Boltinn er ennþá hjá ítalska liðinu og spurning hvort það sé til í að koma hingað til Íslands til að spila báða leikina,“ sagði Andri Snær Stefánsson, þjálfari kvennaliðs KA/Þórs, spurður hver staðan sé á væntanlegum leikjum KA/Þórs og Jomi Salerni í 3. umferð Evrópubikarkeppninnar. Segja má að pattstaða ríki.
Ennþá stendur til að fyrri leikurinn fari fram ytra 14. og 15. nóvember og sá síðari á Akureyri viku síðar. Forsvarsmenn KA/Þórs hafa óskað eftir að báðir leikirnir fari fram hér á landi og sagði Andri Snær í samtali við handbolta.is fyrir nokkru að enginn áhugi væri fyrir Ítalíuferð. Víst er að sá áhugi hefur vart vaxið undanfarna daga.
Hvorki hann né forsvarsmenn KA/Þórs hafa skipt um skoðun. Ástandið er hinsvegar afar óspennandi um þessar mundir þegar kórónuveiran fer eins og eldur í sinu um Evrópu, þar með talið Ísland.
„Auðvitað er erfitt að segja til um þessa leiki þar sem ástandið hér heima er eins og það er auk þess að staðan er ekkert betri á Ítalíu. Ég veit hreinlega ekkert hvernig þetta fer allt saman,“ sagði Andri Snær.
Ekkert hefur heyrst frá Handknattleikssambandi Evrópu, sem er mótshaldari vegna þeirrar pattstöðu sem er uppi.
