Penninn á lofti – fjórir í kippu hjá KA

Penninn var á lofti og handaböndin ekki spöruð á skrifstofu KA á Akureyri í gær þegar tilkynnt var að fjórir leikmenn karlaliðs félagsins hafi ákveðið að taka slaginn áfram með liði félagsins og hripa nöfn sín undir nýja samninga.

Um er að ræða Jón Heiðar Sigurðsson, Allan Norðberg, Patrek Stefánsson og Jóhann Geir Sævarsson. Þar með eru þeir ekki aðeins klárir í slaginn í úrslitakeppninni sem framundan er heldur einnig á næsta keppnistímabili.

Samtals skoruðu fjórmenningarnir 199 mörk í leikjum KA í Olísdeildinni á keppnistímabilinu.

KA mætir Val í KA-heimilinu á þriðjudaginn í fyrri viðureign liðanna í 8-liða úrslitum Olísdeildar.