Poulsen kveður Framara

Vilhelm Poulsen leikmaður Fram sækir að vörn Gróttu í leik í vetur. Mynd/Eyjólfur Garðarsson

Færeyski landsliðsmaðurinn Vilhelm Poulsen yfirgefur herbúðir Fram við lok leiktíðar í vor og gengur til liðs við danska úrvalsdeildarliðið Lemvig. Hann hefur skrifað undir þriggja ára samning við félagið. Greint er frá þessu á samfélagssíðum handknattleiksdeildar Fram og Lemvig í dag.


Poulsen kom til Fram sumarið 2020 ásamt landa sínum Rógva Dahl Christiansen og hefur gert það gott síðan. Poulsen er nú um stundir markahæsti leikmaður Olísdeildarinnar með 105 mörk. Auk þess er hann fastamaður í færeyska landsliðinu sem er í mikili sókn.


„Vilhelm hefur reynst okkur mikill happafengur enda er hann ekki bara frábær leikmaður heldur mikill liðsmaður og drengur góður. Við munum sakna hans úr Fram en fylgjumst með frama hans í boltanum enda er ég sannfærður um að hann á eftir að ná langt. Yngri leikmenn ættu að taka sér Vilhelm til fyrirmyndar þar sem vinnusemi hans og dugnaður utan vallar hafa ekki síst skilað honum þessu tækifæri,“ er haft eftir Bjarna Kristni Eysteinssyni, formanni handknattleiksdeildar Fram í tilkynningu.


Hjá Lemvig kemst Poulsen í kynni við Íslending því markvörðurinn Daníel Freyr Andrésson samdi við Lemvig í vetur. Kemur hann til félagsins á sama tíma og Poulsen.

a>
- Auglýsing -

Nýjustu fréttir

- Auglýsing -