PSG verður fyrir áfalli

Hollendingurinn Luc Steins leikur ekki með PSG í Meistaradeildinni. Mynd/PSG

Franska meistaraliðið PSG varð fyrir áfalli í gær þegar ljóst varð að hollenski miðjumaðurinn Luc Steins tekur ekki þátt í úrslitaleikjum Meistaradeildar Evrópu í handknattleik í Köln. Steins, sem kom til PSG fyrir nokkrum vikum til að hlaupa í skarðið fyrir Nikola Karabatic, hefur greinst með kórónuveiruna. Leikmenn liðanna fjögurra sem taka þátt í úrslitaleikjunum hafa farið þrisvar í skimanir á undanförnum dögum.

PSG mætir Barcelona í fyrri undanúrslitaleik Meistaradeildar í kvöld en í hinni viðureigninni eigast við Veszprém og Kiel. Leikirnir eru liður í keppnistímabilinu 2019/2020 og áttu að fara fram í vor en var þá frestað vegna veirunnar. Sigurliðin í leikjum kvöldsins mætast í úrslitaleik annað kvöld meðan tapliðin leika um þriðja sætið.

Eins og fyrr segir var Steins fenginn til PSG í nóvember til að leysa af Karabatic eftir að sá síðarnefndi sleit krossband í hné.

- Auglýsing -

Nýjustu fréttir

- Auglýsing -