Ragnar Jóhannsson fór vel af stað í sínum fyrsta leik á Íslandi í sex ár þegar hann skoraði átta mörk fyrir Selfoss sem gerði sér lítið fyrir og vann Val örugglega, 30:24, í Origohöllinni í kvöld í Olísdeild karla í handknattleik. Ragnar flutti heim um áramótin og gekk til liðs við sitt uppeldisfélag eftir sex ár í Þýskalandi. Hann sýndi svo sannarlega að hann er kominn til Selfoss-liðsins til þess að láta til sín taka.
Þetta var annað tap Valsmanna í röð í deildinni og eru þeir nú komnir niður í fimmta sæti með átta stig eftir sjö leiki. Selfoss-liðið er hinsvegar í fimmta sæti með sjö stig og hefur aðeins leikið fimm leiki, einum til tveimur færri en flest önnur lið deildarinnar.
Selfoss-liðið var með yfirhöndina og frumkvæðið í Origohöllinni í kvöld. M.a. var þriggja marka munur að loknum fyrri hálfleik, 15:12. Ef marka má þennan leik þá fara leikmenn Selfoss vel af stað eftir fríið en þetta var fyrsti leikur liðsins í Olísdeildinni síðan í byrjun október.
Mörk Vals: Finnur Ingi Stefánsson 9, Magnús Óli Magnússon 4, Vignir Stefánsson 4, Anton Rúnarsson 3, Arnór Snær Óskarsson 2, Tjörvi Týr Gíslason 1, Tumi Steinn Rúnarsson 1,
Varin skot: Martin Nágy 5 skot , 29.8% – Einar Baldvin Baldvinsson 0.
Mörk Selfoss: Ragnar Jóhannsson 8, Nökkvi Dan Elliðason 5, Guðmundur Hólmar Helgason 5, Hergeir Grímsson 3, Tryggvi Þórisson 3, Sveinn Aron Sveinsson 3, Atli Ævar Ingólfsson 2, Einar Sverrisson 1.
Varin skot: Vilius Rasimas 11, 32,4% – Sölvi Ólafsson 0.
