Rakleitt til Miklagarðs eftir stórsigur

Sandra Erlingsdóttir landsliðskona og leikmaður EH Aalborg. Mynd/EH Aalborg Support

Sandra Erlingsdóttir, landsliðskona í handknattleik skoraði fjögur mörk, ekkert þeirra úr vítakasti í dag þegar lið hennar EHF Aalborg vann Rødovre HK örugglega, 33:23, í dönsku 1. deildinni í handknattleik.


Um leið og leiknum var lokið fór Sandra rakleitt út á Kastrup flugvöll þar sem hún er á leiðinni um borð í flugvél áleiðis til Istanbúl eða Miklagarðs eins og borgin nefndist eitt sinn. Í Miklagarði hitti Sandra samherja sína í íslenska landsliðinu sem komu til borgarinnar í dag. Íslenska landsliðið leikur við Tyrki í undankeppni Evrópumótsins á miðvikudaginn.


Sandra og félagar voru með yfirhöndina í leiknum frá upphafi til enda. M.a. var fjögurra marka munur á liðunum að loknum fyrri hálfleik, 17:13. EH Alaborg er í fjórða sæti 1. deildar með 22 stig eftir 17 leiki. Aðeins eru tvö stig í Bjerringbro í þriðja sæti en liðin sem hafna í öðru og þriðja sæti komast í umspil um sæti í úrvalsdeildinni á næsta keppnistímabili.

- Auglýsing -

Nýjustu fréttir

- Auglýsing -